Londra zyrtare beson se COVID-19 është transmetuar nga kafshët te njerëzit në mënyrë natyrale dhe nuk ka të bëjë me laboratorin në Wuhan, transmeton SkyNews.
Mundësia që SARS-CoV-2, lloj i koronavirusit që shkakton COVID-19, të ketë rrjedh rastësisht nga një laborator kinez, nuk mund të kundërshtohet, por ai konsiderohet i pamundur, sipas burimeve të informuara të Whitehall.
Qëndrimi i Londrës zyrtare është në kundërshtim me pretendimet e presidentit amerikan Donald Trump, i cili tha se kishte parë prova që Instituti i Virologjisë Wuhan ishte burimi i pandemisë. Sekretari amerikan i Shtetit Mike Pompeo vazhdoi më tej, duke pretenduar se kishte një sasi të konsiderueshme provash për të mbështetur këtë teori.
Administrata amerikane ka hedhur fajin ndaj Kinës për pandeminë në një bllokim që i ka bërë pyetjes rreth origjinës së virusit gjithnjë e më shumë politike.
Një deklaratë e lëshuar nga agjencitë e inteligjencës së SHBA-së javën e kaluar ishte më e ekuilibruar kur konsiderohej nëse virusi fillimisht infektoi njerëzit natyrshëm nga një ndërveprim me një kafshë apo nëse transmetimi ka ndodhur rastësisht në një laborator.
Sidoqoftë, Zyra e Drejtorit të Inteligjencës Kombëtare, e cila mbikëqyr të gjitha agjencitë e inteligjencës dhe sigurimit të SHBA-së, nuk vendosi peshë në asnjë teori, në kontrast me Britaninë e Madhe.
Komuniteti i inteligjencës “do të vazhdojë të ekzaminojë me rigorozitet informacionin dhe inteligjencën në zhvillim për të përcaktuar nëse shpërthimi filloi përmes kontaktit me kafshët e infektuara ose nëse ishte rezultat i një aksidenti në një laborator në Wuhan”, thuhet në deklaratë.
Instituti i Virologjisë Wuhan ka hedhur poshtë çdo sugjerim se ishte origjina e pandemisë.
Liu Xiaoming, ambasadori i Kinës në Londër, gjithashtu hodhi poshtë pretendimet e presidentit Trump si “dezinformim”.
Pozicioni i Britanisë së Madhe për origjinën e koronavirusit është më shumë në përputhje me Australinë.
Kryeministri i Australisë, Scott Morrison, ka thënë se skenari më i mundshëm është që ai filloi në një treg të kafshëve të egra në qytetin e Wuhan. Ai po bën thirrje për një hetim ndërkombëtar për atë që ndodhi.
Britania e Madhe beson se vendndodhja e saktë ku ndodhi infektimi parë nga kafsha te njeriu nuk mund të dihet kurrë, transmeton KosovaPress.
Në Uashington të martën, një gjeneral i lartë amerikan tha që origjina e virusit mbetet një mister.
“A doli nga laboratori i virologjisë në Wuhan? A ndodhi në një treg në Wuhan? A ndodhi diku tjetër? Dhe përgjigjja për këtë është: Ne nuk e dimë,” tha gjenerali Mark Milley në një konferencë për shtyp./ Tv Malisheva
