Klubi i futbollit Llapi ka lëshuar një reagim përmes së cilit ka bërë të ditur se janë të pakënaqur me mosftesën e asnjë lojtari nga trajneri i Kosovës U17 Arsim Abazi nga ky klub, ndërsa janë ftuar deri në katër lojtarë nga klubet tjera.
Ata shprehen se po bëhet një padrejtësi e madhe ndaj këtij klubi kur dihet se lojtarët e këtij klubi janë duke pasur suksese të shumta në garat kampionale.
Llapi ka kërkuar nga trajneri Abazi dhe stafi i tij që t’i kthejnë sytë nga akademia e Llapit.
Shkrimi i plotë i lëshuar nga KF Llapi në “Facebook”:
Klubi Futbollistik “Llapi” reagon ndaj grumbullimit të radhës së Përfaqësueses së Kosovës U-17 dhe përzgjedhësit Arsim Abazi për mosftesën e asnjë lojtari të grupmoshës U-17 të KF “Llapi” edhe pse nga klube tjera ka edhe nga 4 futbollistë të thirrur, ani pse cilësia e futbollistëve tanë në krahasim me disa futbollistë të klubeve tjera me plotë bindje themi se është shumë më e madhe. Kjo nuk është hera e parë sepse edhe në grumbullimet e kaluara kjo gjë i ka ndodhur futbollistëve të Akademisë së futbollit “Llapi”.
Mendojmë se kjo është një padrejtësi e madhe kundrejt punës së trajnerëve të Akademisë sonë dhe futbollistëve që me përpikëri kryejnë detyrat si në stërvitje dhe në ndeshje kampionale dhe triumfojnë me rezultate bindëse ndaj klubeve në garat kampionale por kjo siç duket nuk i ka rënë në sy përzgjedhësit Arsim Abazi dhe stafit të tij që jo për dëshirë por po shihet edhe rezultati i ndeshjes (0-2) për Shqipërinë U17.
Me mirëkuptim të plotë kërkojmë nga përzgjedhësi dhe stafi i tij që të kthejnë sytë nga djelmoshat e Akademisë së futbollit “Llapi” të cilët çdo ditë e më shumë po tregojnë rezultate kulminante dhe të cilat janë një pasqyrë reale për t’i grumbulluar me fanellën më të bukur në botë dhe atë që çdo kush ndihet krenar kur e vesh, të Përfaqësueses së Kosovës! /TV Malisheva
