Presidenti Hashim Thaçi ka takuar sot ambasadorët e QUINT-it në Kosovë dhe përfaqësuesen e Bashkimit Evropian, të cilëve u ka treguar se i ka kërkuar kreut të LDK-së Isa Mustafa, të ofrojë kandidatin për formimin e qeverisë re.
Presidenca njofton se Thaçi u ka thënë ambasadorëve se çdo hap që po e ndërmerr është në përputhje me Kushtetutën dhe ligjet e Kosovës.
Në komunikatë citohet presidenti Thaçi t’u ketë thënë përfaqësuesve të huaj se pas konsultimeve me partitë pulitke është e qartë se shumica absolute janë në favor të formimit të qeverisë së re pa shpërbërjen e Kuvendit.
“Pas konsultimeve me partitë politike i kam kërkuar Kryetarit të LDK-së, Isa Mustafa, të ofrojë kandidatin apo kandidaten për formimin e Qeverisë së re”, është shprehur Thaçi.
Ky është njoftimi i Presidencës:
Presidenti i Republikës së Kosovës, Hashim Thaçi, ka ftuar sot përfaqësuesit e ambasadave të Quintit dhe përfaqësuesen e BE-së, të cilët i ka njoftuar për hapat e ndërmarrë pasi partitë politike të përfaqësuara në Kuvendin e Kosovës kanë shprehur vullnetin që të formohet një Qeveri e re pas shkarkimit të Qeverisë Kurti.
Në këtë takim ishin ambasadori i SHBA-së, ai i Britanisë së Madhe, i Gjermanisë, ambasadorja e Francës, ambasadori i Italisë dhe Përfaqësuesja Speciale e BE-së në Kosovë.
Presidenti Thaçi u shpreh se pas konsultimeve me partitë politike është e qartë se shumica absolute janë në favor të formimit të Qeverisë së re pa shpërbërjen e Kuvendit dhe konform këtij vullneti të shprehur dhe në përputhje me Kushtetutën dhe ligjet e Kosovës ka kërkuar nga LDK-ja kandidatin apo kandidaten për të formuar Qeverinë e re.
“Pas konsultimeve me partitë politike i kam kërkuar Kryetarit të LDK-së, z. Isa Mustafa, të ofrojë kandidatin apo kandidaten për formimin e Qeverisë së re”, është shprehur presidenti Thaçi, duke shtuar se “çdo hap është dhe do të jetë në përputhje me Kushtetutën dhe ligjet e Kosovës”./Tv Malisheva
