Nënkryetari i Organizatës së Veteranëve të Luftës së UÇK-së, Nasim Haradinaj nuk është deklaruar rreth fajësisë ose pafajësisë para Dhomave të Specializuara në Hagë. Por ai ka folur në seancën e sotme duke kundërshtuar Gjykatën Speciale. Haradinaj ka thënë se Prokuroria e Speciales është e korruptuar dhe po synon të largojë vëmendjen nga vetja rreth rrjedhjes së dokumenteve të Speciales muaj më parë, siç tha ai, duke fajësuar veteranët e UÇK-së.
Pasi u pyet nga gjyqtari i procedurës paraprake se a kupton aktakuzën ndaj tij, Haradinaj tha se fare nuk e ka lexuar atë.
Haradinaj: Nuk e kam lexuar aktakuzën
“Kam nënshkruar një dokument që e kam pa aktakuzë, por ju them të drejtën as lexu nuk e kam”, tha ai.
Haradinaj tha se në vend tij para gjyqit do duhej të ishin personat që kanë nxjerrë dokumentet nga Specialja dhe i kanë dërguar ato në Kosovë në selinë e OVL-UCK-së.
Haradinaj: Prokurori synon të heq vëmendjen nga vetja për nxjerrjen e dokumenteve të Speciales
“Kjo prokurori do të heq vëmendjen nga vetja dhe të kërkojë fajin krejt diku tjetër. Në Kosovë, që për ta, siç po shihet këtu, Kosova dhe qytetarët e saj janë fajtor kujdestar. Pra, ne duhet të përgjigjemi se pse ju dolën sekretet e tyre, dhe u sollën mijëra km larg në zyrat tona, dhe mos harroni, ato nuk ishin as një as dy gletë, por mijëra fletë e faqe. OVL UÇK nuk ka pasur qasje dhe nuk kas, dhe as mund të fajësohet për nxjerrjen nga sirtarët e tyre dokumentet, në vend timin këtu do duhej të ishin kolegët e tyre, të kësaj prokuroria”, tha Haradinaj.
Ai tha se po akuzohen për fajet e prokurorisë, që sipas tij kjo është absurde.
Haradinaj: Është çmenduri të mbajmë përgjegjësi për dokumentet që dikush i ka sjellë në Kosovë
“Nga ne dhe qëndrimet tona nuk keni çka pritni dhe befasoheni sepse qëndrimi ynë ka qenë publik dhe çdo here dyshohet në këto dhoma. Mohimi i faktit, duke anashkaluar kush i nxori nga sirtarët e kësaj prokurorie këto dokumente, kush i solli në Kosovë, kush na i solli në seli, e për këtë ta mbajmë ne përgjegjësinë është çmenduri dhe aspak drejtësi”, tha ai.
Në fjalimin e tij para gjyqtarit të procedurës paraprake, Haradinaj ka thënë se Prokuroria është e korruptuar.
Haradinaj: Prokuroria e Speciales është e korruptuar
“Për mendimin tim, kjo prokurori është së pari politike, selektive dhe njëanshme, por tani me këtë veprim të tyre po dyshoj dhe bindem se është e dhe e korruptuar sepse ndryshe nuk do u dilte gjithë ai material nga zyrat e tyre” tha Haradinaj.
Haradinaj nuk e ka bërë deklarimin e tij sot rreth fajësisë apo pafajësisë dhe ka thënë se nga sot do të flasë vetëm avokati i tij.
Sipas rregullave, brenda 30 ditësh Haradinaj do të ftohet të vet-deklarohet rreth fajësisë apo pafajësisë.
Ndërsa mbrojtja e Haradinaj ka deklaruar se është caktuar t’a mbrojë atë vetëm disa minuta para se të nisë seanca.
Ai tha se ende nuk ka pasur mundësi të flasë me Haradinajn, andaj i duhet kohë që të konsultohet me të, meqë si tha ai, e ka takuar atë vetëm për 10 minuta para fillimit të seancës.
Konferenca mbi ecurinë e çështjes së Haradinajnt pritet të mbahet më 7 ose 8 janar të vitit të ardhshëm.
Nasim Haradinaj ngarkohet me vepra penale kundër administrimit të drejtësisë.
Ai është arrestuar më 25 shator 2020 dhe dërguar në paraburgim në Hagë, pas bastisjes që hetuesit e Speciales dhe Policia e EULEX-it kanë bërë në zyrat e OVL-UÇK-së.
E disa ditë para kësaj, krerët e kësaj organizate në konferenca për media kishin deklaruar se në selinë e tyre në Prishtinë, nga persona të paidentifikuar, po arrijnë pako me dokumente të Speciales.
