Gjysma e evropianëve nuk janë të kënaqur me masat e marra nga Bashkimi Evropian në luftën kundër pandemisë së virusit korona, ndërsa 48% janë të kënaqur, tregojnë rezultatet e sondazhit të Eurobarometrit të botuara sot.
Hulumtimi tregon se më të pakënaqurit janë qytetarët e Gjermanisë, ku 63% e të anketuarve deklaruan se besojnë se BE nuk iu përgjigj mirë pandemisë.
Francezët pasojnë me 60 për qind dhe grekët me 58 për qind të qytetarëve të pakënaqur, raporton Politico.
Më të kënaqurit me mënyrën se si BE menaxhoi pandeminë janë danezët, 81 për qind, e ndjekur nga Holanda me 74 për qind dhe Malta me 73 për qind.
Studimi u krye në mars dhe prill, kur vaksinimi në BE ishte prapa Britanisë së Madhe dhe SHBA.
Përkundër pakënaqësisë me përgjigjen e Brukselit ndaj pandemisë, 74 për qind e të anketuarve ende besojnë se BE duhet të ketë më shumë kompetenca në luftën kundër krizave të tilla si një pandemi, por ky numër është pak më i ulët se në sondazhin e fundit të kryer vjeshtën e kaluar./TV Malisheva
