Anis Hamollari e kishte planin të përgatitur: ai do të merrte me qira një apartament për ta përdorur më pas si fermë kanabisi.
Mendonte se e kishte çdo gjë nën kontroll. I riu kishte depozituar 6.438 funte për shtëpinë me tri dhoma gjumi në Exeter, por bëri një gabim: u përpoq të korruptonte agjentët e pasurive të paluajtshme, të cilët ishin lajmëruar nga fqinjët se një erë e fortë vinte nga banesa dhe i kishin kërkuar të kontrollonin.
Ata zbuluan se 25-vjeçari ishte përpjekur të krijonte brenda banesës kushtet për rritjen e bimëve narkotike. Që të mos flisnin, shqiptari i ofroi 7 mijë funte, por ata refuzuan dhe ai u largua me shpejtësi. Policia gjeti më pas në banesë 97 bimë kanabis sativa, me një vlerë tregu prej 200 mijë funte. Arratia e Hamollarit nuk zgjati shumë, pasi ai u arrestua dhe u dënua me 18 muaj burg.
Prokurori Richard Crabb tha se kur kishte marrë shtëpinë me qira, shqiptari kishte përdorur emër të rremë me dokumente italiane.
25-vjeçari i tha policisë se ishte trafikuar në Britani nga banda kriminale, të cilat dhe e kanë detyruar që të kryente këto shkelje./tch/TV Malisheva
