Është ndarë nga jeta në moshë të hershme, producenti dhe muzikanti nga Shkupi, Ylber Aliu.
Me të marrë lajmin e hidhur, shumë prej emrave të njohur të estradës, kanë shprehur dhimbjen e tyre me ndarjen nga jeta të parakohshme të producentit.
Reperi i njohur shqiptar, Gold AG, emri i vërtetë i të cilit është Arian Agushi, publikoi një fotografi në Instagram me të ndjerin, në mbishkrimin e së cilës shprehu dhimbjen e tij të madhe pas marrjes së lajmit të kobshëm.
“Allahu të mëshiroftë o vlla Ylber, do t’na mungosh gjithmonë deri sa një ditë të takohemi në Xhenet me lejen e Krijuesit mëshirplotë”, shkroi Gold AG në Instagram.
E ngushëllime për vdekjen e të ndjerit shprehu edhe këngëtari Blero, i cili zgjodhi gjithashtu një fotografi nga arkivat me Ylberin, për ta publikuar atë në llogarinë e tij zyrtare.
“Ah bre Ylber ma këpute shpirtin. Gjithmonë kam me të mbajt në zemër me kujtimet më të bukura që kemi pasur bashkë. Familjes Aliu ngushëllime. Allahu të shpërbleftë me xhenet vëlla”, shkroi Blero Muharremi në Instagram.
Këngëtari i njohur nga Gjakova, Edi Furra, gjithashtu i ndau disa rreshta për muzikantin tashmë të ndjerë.
Ai publikoi një video në rrjetin social Facebook të një instrumentali të Ylberit, duke shkruar në mbishkrimin e saj se arti i popullit tonë humbi shumë sot.
“Me këtë Instrumental të luajtur në mënyrën të nivelit më të lartë, dua të shpreh ngushëllimet më të sinqerta familjes Aliu, artit në përgjithësi, shokëve, dashamirëve. Sot kombi jonë humbi një ikonë të muzikës popullore, nuk dua ta zgjas shumë por humbje e madhe. Ylberi do të kujtohet gjithmonë si mjeshtër nga ne”, shkroi Edi Furra.
Edhe këngëtari dhe tekstshkruesi i njohur nga Maqedonia, Lindon Berisha, publikoi një fotografi të muzikantit Aliu në InstaStory, duke shkruar se u trondit nga lajmi për vdekjen e tij.
“Para pak çastesh mora lajmin tronditës për Ylber Aliun, që ka lënë këtë botë. Zoti e pastë mëshiruar. Ngushëllime familjes, shpresoj të gjejnë forcën dhe durimin”, ka shkruar Lindoni.
Ylber Aliu përndryshe do të kujtohet si një ndër producentët dhe muzikantët, i cili pati rastin të bashkëpunojë me shumë emra të njohur të muzikës, në prurjen e projekteve muzikore që gjithmonë u mirëpritën nga publiku.
Ai u nda nga jeta në moshën 33-vjeçare, duke lënë pas vetes tre fëmijë: dy vajza dhe një djalë. /TV Malisheva
