Legjenda e futbollit brazilian, Pelé ka pasur një tumor të dukshëm në anën e djathtë të zorrës së tij, të cilin ia kanë hequr në një operacion.
Operacioni ishte një “fitore e madhe”, tha 80-vjeçari në mediat sociale të hënën.
“Të shtunën e kaluar unë iu nënshtrova një operacioni për të hequr një lezion të dyshimtë në zorrën e trashë të djathtë. Tumori u identifikua gjatë testeve që përmenda javën e kaluar”, tha Pelé.
“Për fat të mirë, jam mësuar të festoj fitore të mëdha përkrah jush. Unë do ta përballoj këtë ndeshje me një buzëqeshje në fytyrën time, shumë optimizëm dhe gëzim për të jetuar i rrethuar nga dashuria e familjes dhe miqve të mi”, shtoi ai.
Ish-sulmuesi, i cili fitoi tre Kupat e Botës me Brazilin, u shtrua në spital në Sao Paulo pasi u shfaqën probleme gjatë kontrolleve rutinë që i kishte bërë gjatë javës së kaluar.
Ai hyri në spital më 31 gusht, duke postuar në mediat sociale për të thënë se ishte “në gjendje të mirë shëndetësore” dhe duke mohuar thashethemet se kishte humbur vetëdijen.
“Unë shkova në spital për testet rutinë që nuk kisha qenë në gjendje t’i bëja më parë për shkak të pandemisë”, shpjegoi ai, pa specifikuar se ai mbeti i shtruar në spital, shkruan euronews. /TV Malisheva
