Organizata Botërore e Shëndetësisë njoftoi sot se vaksinat ekzistuese kundër koronavirusit mund të kenë nevojë të përshtaten për të siguruar efikasitet kundër varianteve të reja të viruseve si omicron.
“Përbërja e vaksinave ekzistuese COVID-19 mund të ketë nevojë të rregullohet për të siguruar që vaksinat të vazhdojnë të ofrojnë nivele të mbrojtjes kundër infeksionit dhe sëmundjeve, duke përfshirë llojin omicron dhe të gjitha llojet e tjera,” thuhet në deklaratë, përcjell Reuters.
Më herët gjatë ditës së sotme, drejtori i OBSH-së për Evropën, Hans Kluge, deklaroi se më shumë se gjysma e popullsisë së Evropës do të infektohet me omicron në gjashtë deri në tetë javët e ardhshme.
Ai tha gjithashtu se lloji omicron u regjistrua në 50 nga 53 vendet në Evropë dhe Azinë Qendrore dhe se shpejt u bë dominues në Evropën Perëndimore dhe tani po përhapet në Ballkanin Perëndimor.
“Në Evropë, më shumë se shtatë milionë raste të raportuara rishtazi të COVID-19 u regjistruan në javën e parë të 2022, më shumë se dyfishuar në dy javë,” tha Kluge në një konferencë shtypi.
“Me këtë ritëm, Instituti për Statistikat dhe Vlerësimin e Shëndetësisë parashikon që më shumë se 50 për qind e popullsisë në rajon do të infektohet me omicron në gjashtë deri në tetë javët e ardhshme,” paralajmëroi Kluge.
Ai theksoi se omicron është bërë dominues dhe se është e nevojshme të përdoren të gjitha instrumentet në dispozicion në luftën kundër përhapjes./TV Malisheva
