Presidenti rus, Vladimir Putin, duhet të inkurajohet të largohet “me nder” nga Ukraina dhe t’i japë fund konfliktit, tha presidenti turk Rexhep Tajip Erdogan.
“Ne duhet t’i themi Putinit, ju duhet të jeni tani ai që do të bëjë një hap drejt paqes. Ne duhet të përpiqemi ta zgjidhim këtë konflikt duke inkurajuar një dalje të nderuar,” tha Erdogan, duke u kthyer nga samiti i NATO-s në Bruksel.
Erdogan tha se do të zhvillojë bisedime me presidentët ukrainas Volodymyr Zelensky dhe Putin për të vlerësuar detajet e samitit të NATO-s.
“Nuk mund të bëjmë asgjë për sanksionet”
Ankaraja e sheh veten si ndërmjetëse në konflikt dhe ka marrëdhënie të ngushta me Ukrainën dhe Rusinë. Erdogan beson se një kompromis midis Kievit dhe Moskës është ende i mundur, duke përfshirë tërheqjen e Ukrainës nga anëtarësimi në NATO dhe çarmatimin e pjesshëm. Megjithatë, të dyja palët mbeten në mosmarrëveshje për çështjet territoriale.
Erdogan përsëriti se Turqia “nuk mund të bëjë asgjë” në lidhje me sanksionet perëndimore për shkak të varësisë së saj energjetike nga Rusia. “Unë nuk mund t’i lë qytetarët e mi të bllokuar… Unë nuk mund ta ndal industrinë. Ne duhet t’i ruajmë ato interesa,” ishte i qartë Erdogan.
Rusia është furnizuesi kryesor i Turqisë me gaz. Rusët përbëjnë pothuajse numrin më të madh të turistëve të huaj në Turqi dhe të dy vendet po ndërtojnë së bashku termocentralin e parë bërthamor.
/TV Malisheva
