Në funksion të zbatimit të vendimit të kryetarit të Komunës së Malishevës, Ekrem Kastrati, që muaji prill të jetë muaj i pastrimit të ambientit në tërë territorin e Malishevës, sot ka nisur një aksion i madh i pastrimit të qytetit, për të vazhduar ditëve në vijim edhe nëpër fshatrat e komunës.
I pari i Malishevës, Ekrem Kastrati i shoqëruar edhe nga nënkryetari, Vesel Krasniqi, kryesuesi i Kuvendit, Argjend Thaçi, drejtorët dhe gjithë punëtorët e administratës komunale, institucionet shëndetësore, Policia e Kosovës, kompanitë publike; Ekoregjioni, Hidroregjioni, Zjarrfikësit, OJQ-të, si dhe shumë qytetarë vullnetarë, sot ju bashkuan këtij aksioni të pastrimit, për një ambient të pastër, dhe që njëkohësisht i paraprinë edhe shënimit të Ditës Ndërkombëtare të Tokës, që është më 22 prill.
” Ne si Komunë në bashkëpunim me institucionet tjera të përfshira dhe gjithë qytetarë, do të angazhohemi maksimalisht për një ambient më të pastër në tërë komunën tonë, dhe ky është veç fillimi i realizimit të projektit për ” Malishevën Urbane”.
“Vetëm kur punojmë të gjithë bashkë, krijojmë ambient të bukur dhe mirëqenie më të mirë për qytetarët tanë”, tha në fund, kryetari i Komunës së Malishevës, Ekrem Kastrati.
