Ministri i Jashtëm ukrainas Dmytro Kuleba shprehu besimin sot se situata në lidhje me vizitën e presidentit gjerman Frank-Walter Steinmeier në Ukrainë do të zgjidhet me diplomaci dhe nuk do të dëmtojë marrëdhëniet ukrainas-gjermane.
Ai theksoi në një konferencë të përbashkët për shtyp me homologun e tij irlandez Simon Kauni në Kiev, se Ukraina qëndron për marrëdhënie të bazuara në respektin e ndërsjellë dhe ndërtimin e një politike të re gjermane ndaj Ukrainës në rrethanat aktuale.
Ai shtoi se Kievi nuk pajtohet gjithmonë me politikën gjermane, por se respekton Gjermaninë si shtet dhe partner, si dhe institucionin e presidentit federal, transmeton Interfax Ukraine.
Kuleba shprehu keqardhjen që raportimi i një media gjermane, e cila i referohet burimit, ka shkaktuar një situatë kaq të vështirë.
“Ka shumë punë në diplomaci që të harmonizohen formatet e vizitave, rezultatet e pritshme të vizitave dhe kur me këtë punë merren vetëm diplomatët, ne gjejmë gjithmonë zgjidhje të pranueshme reciprokisht. Kur nuancat e procesit të punës mbërrijnë në media, ka debate publike, skandale publike, emocione publike që pengojnë punën dhe krijojnë një sfond negativ”, sqaroi Kuleba.
Në fillim të kësaj jave, Steinmeier tha se ai planifikoi të vizitonte Kievin me homologun e tij polak dhe presidentët e Estonisë, Lituanisë dhe Letonisë “për të dërguar një shenjë të fortë të solidaritetit evropian me Ukrainën, por se ata nuk e donin këtë në Kiev”.
Gazeta gjermane Bild raportoi se Zelensky refuzoi vizitën e Steinmeier për shkak të marrëdhënieve të tij të ngushta me Rusinë në vitet e fundit dhe mbështetjes afatgjatë për projektin e gazsjellësit Nord Stream 2.
Zëvendësshefi i Shtabit të Presidentit të Ukrainës, Igor Zhovko, shpjegoi se Steinmeier nuk ishte ftuar në Kiev, pasi Ukraina pret vendime konkrete nga Berlini për embargon ndaj furnizimeve të naftës nga Rusia, si dhe ato që lidhen me ndihmën ushtarake dhe ekonomike për Ukrainën, veçanërisht sigurimi i armëve të rënda.
/TV Malisheva
