Komisioni për Ekonomi, Industri dhe Ndërmarrësi dhe Tregti, ka miratuar në parim Projektligjin për ndryshimin dhe plotësimin e Ligjit për energjinë.
Para anëtarëve të komisionit të martën, ministrja e Ekonomisë, Artane Rizvanolli, tha se përmes këtij projektligji do të zgjaten afatet për masat emergjente për krizën energjetike, ku vendimi parasheh që masat emergjente të jenë 90 ditë, me mundësi vazhdimi edhe për 90 ditë të tjera, ndryshe nga tash që janë vetëm nga 30 ditë.
Në anën tjetër, ajo tha se në masat për kursimin e energjisë në situatat emergjente do të përfshihet ndalimi i ndriçimi dekorativ, reklamues dhe kufizimi i ndriçimit publik. Për këto përveç inspektoratit, ajo tha se do të angazhohet edhe Policia e Kosovës.
Rizvanolli: Ky projektligj zgjidh afatin e masave emergjente dhe për kursimin e energjisë
“Prek dy çështje të rëndësishme në lidhje me masat emergjente të furnizimit me energjinë, afatin e masave emergjente, si dhe masat për kursimin e energjisë dhe zbatimin e tyre. Së pari, propozimi për ndryshim-plotësim optimizëm afatin e masave emergjente që në rastet kur nuk lidhen me gjendjen e jashtëzakonshme, në vend që qeveria të kërkojë vendin të Kuvendit çdo tridhjetë ditë, projektligji parasheh që vendimi të vlejë 90 ditë me mundësi vazhdimi për 90 ditë të tjera…Projektligji parasheh masa të detyrueshme të kursimit të energjisë gjatë situatës emergjente dhe sanksione për moszbatimin e tyre. Masat e kursimit mund të caktohen me vendim të ministrit, ku përfshihen ndalimi i ndriçimit dekorativ, reklamues. Ndalimi dhe kufizimi i ndriçimit publik, përveç ndriçimit të domosdoshëm për sigurinë e publikut dhe komunikacionit… Sanksionet për moszbatimin e masave përfshijnë gjobën, sekuestrimin e pajisjeve si dhe ndalimin e përkohshëm të ushtrimit të veprimtarisë”, tha ajo.
Por, kundërshtime ndaj këtij projektligji shprehu kryetari i komisionit, deputeti i PDK-së, Ferat Shala. Ai tha se i njëjti nuk sjell ndonjë ndryshim të madh, përveç komoditetit më të madh politik të Qeverisë së Kosovës.
Shala – Rizvanollit: Projektligji nuk sjell ndryshim të madh, duhet ligj i ri
“Kam prit se do të na sjellësh një ligj komplet të ri, konform rregullave, tregut, situatës dhe strategjisë së re që po pret të votohet në Kuvend. Këtu nuk shoh ndonjë ndryshim të madh, përveç që do t’i jep një komoditet vendimmarrjes politike, të tjerat do të mbesin në të njëjtën shkallë dhe dinamikë. Do të ishte mirë t’i shfrytëzoni këto kapacitete që të hartoni një ligj që do të kishte qenë shumë më proaktiv dhe efikas në rrethanat që aktualisht jemi”, theksoi ai.
Shqetësime për projektligji ngriti edhe deputeti i AAK-së, Pal Lekaj. Ai kërkoi që Policia e Kosovës mos të ketë angazhim shtesë në sanksionimin e moszbatimit të vendimeve për kursim të energjisë.
Lekaj: Ky projektligj është i vonuar
“Ky është një projektligj i vonuar sepse ne kemi humbur shumë kohë sa i përket vendimeve at-hoc të Qeverisë, por edhe të Kuvendit që nuk kanë shkuar në favor të qytetarëve të Kosovës, por që edhe i kanë shkaktuar dëme buxhetit të Kosovës. Si ligj keni pasur kohë shumë më herët që të procedoni dhe ne mos të merremi më tepër sa i përket vendimeve”, shtoi ai.
Duke iu kundërpërgjigjur, ministrja tha se Policia e Kosovës ka pasur rol në asistimin e sanksionimit edhe në kuadër të ligjeve të tjera. Ndërkohë, tha se gjatë agjendës legjislative të këtij viti është paraparë edhe miratimi i ligjeve të tjera për energji.
/TV Malisheva
