Profesori i së drejtës dhe marrëdhënieve ndërkombëtare, Robert Muharremi, ka shpejguar se çfarë thotë neni 7 i propozimit të BE-së për normalizimin e marrëdhënieve mes Kosovës dhe Serbisë, i cili u publikua mbrëmë pas përfundimit të takimit mes Kurtit dhe Vuçiqit.
Muharremi në Linkedin, ka thënë se neni apo pika 7 e propozimit të BE-së, jep më shumë autonomi se sa Asociacioni i komunave me shumicë serbe.
Ai shpjegon se pika 7 jep të drejta vetëm serbëve dhe jo edhe komuniteteve tjera qysh parashihen me Asociacionin.
Profesori shpreson se Qeveria e ka të ditur se çfarë po pranon.
Robert Muharremi, ishte angazhuar edhe në grupin e ekspertëve që do të mbështesnin delegacionin e Qeverisë Kurti në procesin e dialogut me Serbinë.
Ndryshe, mbrëmë Bashkimi Evropian ka publikuar zyrtarisht propozimin e BE-së apo i njohur si plani framko-gjerman.
Në të janë 11 nene, të cilat sonte janë miratuar vetëm verbalisht pasi palët kosovare dhe serbe nuk kanë nënshkruar propozimin e BE-së.
Neni 7 i planit “Marrëveshja për rrugën e normalizimit ndërmjet Kosovës dhe Serbisë” i propozuar nga Bashkimi Evropian thotë se, në përputhje me instrumentet përkatëse të Këshillit të Evropës, palët do të sigurojnë një nivel të vetë-manxhimit për komunitetin serb në Kosovë në disa fusha. Këtu përfshihet edhe mundësia e ndihmës financiare nga Serbia.
Ky nen gjithashtu kërkon që palët të zyrtarizojnë statusin e Kishës Ortodokse Serbe në Kosovë dhe të ofrojnë mbrojtje për objektet e trashëgimisë fetare dhe kulturore serbe.
Neni 7
Të dyja palët angazhohen të krijojnë marrëveshje dhe garanci specifike, në përputhje me instrumentet përkatëse të Këshillit të Evropës dhe duke u mbështetur në përvojat ekzistuese evropiane, për të siguruar një nivel të duhur të vetë-menaxhimit për komunitetin serb në Kosovë dhe aftësinë për ofrimin e shërbimeve në fusha specifike, duke përfshirë mundësinë e mbështetjes financiare nga Serbia dhe një kanal të drejtpërdrejtë komunikimi për komunitetin serb me Qeverinë e Kosovës.
Palët do të zyrtarizojnë statusin e Kishës Ortodokse Serbe në Kosovë dhe do të ofrojnë nivel të fortë mbrojtjeje për objektet e trashëgimisë fetare dhe kulturore serbe, në përputhje me modelet ekzistuese evropiane.
/TV Malisheva
