Në rastin e marrëdhënieve Shqipëri-Kosovë, tensionet politike dhe ambiciet konfliktuale tani po vlojnë dhe efekti do të favorizojë në radhë të parë agjendën rajonale të Serbisë, thotë përmes një shkrimi autorial njohësi i çështjeve të Ballkanit, Janusz Bugajski.
Në shkrimin e botuar në The Geopost pas anulimit të mbledhjes së dy qeverive Kosovë – Shqipëri, Bugajski flet për kritikat e kryeministrit Albin Kurti ndaj kryeministrit Edi Rama për mbështetjen e presidentit Aleksandar Vuçiq duke ndihmuar në hartimin e një statuti për një ent autonom serb në Kosovë pa u konsultuar me Prishtinën.
“Në fakt, Prishtina ka një grumbullim ankesash kundër Tiranës dhe veçanërisht ndaj qeverisë aktuale socialiste. Udhëheqësit e Kosovës kanë ngritur pyetje serioze mbi mbështetjen e Ramës për nismën e Ballkanit të Hapur – një format që favorizon biznesin serb dhe objektivat ekspansioniste. Qeveria në Tiranë gjithashtu demonstron pak solidaritet publik me Prishtinën për çështje jetike në dialogun me Beogradin. Në të vërtetë, shpesh duket se lidhjet personale mes Ramës dhe Vuçiqit tejkalojnë çdo shqetësim për sigurinë e Kosovës dhe integrimin ndërkombëtar”, shkruan ai.
Sipas Bugajskit, një lojë më e thellë është në pyetje.
“Rama beson se Tirana duhet të jetë qendra e “botës shqiptare” me Prishtinën si kryeqytet provincial. Qëllime të tilla janë të neveritshme nga pothuajse të gjithë liderët politikë në Kosovë, të cilët e shohin shtetin si arritjen e tyre kurorëzuese pas viteve të nënshtrimit ndaj përsëritjeve të ndryshme të Serbi-Jugosllavisë. Edhe pse Kurti ka shprehur mbështetjen e mundshme për një shtet të vetëm shqiptar përmes procedurave demokratike dhe një referendumi të hapur, është e vështirë të imagjinohet pranimi i tij për një bashkim me Shqipërinë, në të cilën statusi i Kosovës është ulur në një krahinë. Për më tepër, sa më gjatë të ekzistojë Kosova si shtet, aq më e thellë është ndjenja e dallueshmërisë tek popullata e saj dhe mosgatishmëria për t’u nënshtruar sërish”, vijon ai.
Ai thekson se kryeministri i Shqipërisë, Edi Rama, shfaq një pikëpamje të panshqiptarizmit me në qendër Tiranën, në të cilën “mund të bëhen marrëveshje mbi kokat e liderëve të zgjedhur në Prishtinë”.
/TV Malisheva
