Sekretari amerikan i Shtetit, Antony Blinken foli me telefon me ministrin e Jashtëm të Kinës të mërkurën, një telefonatë që vjen përpara një vizite të shumëpritur të diplomatit të lartë të Uashingtonit në Pekin, ndërsa dy superfuqitë përpiqen të përmirësojnë gjendjen e zymtë të lidhjeve të tyre.
Në telefonatën e tij me Qin Gang, Blinken diskutoi “rëndësinë e mbajtjes së linjave të hapura të komunikimit” për të menaxhuar me përgjegjësi marrëdhëniet SHBA-Kinë për “të shmangur llogaritjet e gabuara dhe konfliktet”, tha në një deklaratë zëdhënësi i Departamentit të Shtetit të SHBA, Matthew Miller.
Sipas mediave të huaja, Blinken trajtoi gjithashtu një sërë çështjesh dypalëshe dhe globale dhe bëri të qartë se “SHBA do të vazhdojë të përdorë angazhimet diplomatike për të ngritur fushat e shqetësimit, si dhe fushat e bashkëpunimit të mundshëm”, thuhet në deklaratë.
Ndërsa nga Kina u nënvizua mosbesimi i thellë që vazhdon midis Pekinit dhe Uashingtonit.
Kështu, Qin i tha Blinken se SHBA duhet të “tregojë respekt” për shqetësimet thelbësore të Kinës, siç është çështja e Tajvanit.
Në detajet e telefonatës së SHBA-së dhe Kinës nuk përmendën vizitën e Blinken, e cila nuk është njoftuar zyrtarisht nga Departamenti i Shtetit i SHBA-së apo Ministria e Jashtme e Kinës.
Por dy zyrtarë amerikanë dhe një burim i njohur me këtë çështje i thanë CNN në fillim të këtij muaji se Blinken pritej të udhëtonte në Kinë në javët e ardhshme.
/TV Malisheva
