Partia Demokratike e Kosovës dhe Aleanca për Ardhmërinë e Kosovës kërkuan të ndërpritet seanca plenare, pas rrahjes së sotme në Kuvend.
Deputetja e PDK-së, Eliza Hoxha akuzoi kabinetin qeveritar se provokoi dhunën në Kuvend.
“Ne adresuam një çështje shumë të rëndësishëm dhe nëse për ju është e parëndësishme është çështja e diskutimeve me njeriun që ka fletëarrest, me Radojçiqin dhe dëshironi ta normalizoni, duke prodhuar skandal, për mua është e pafalshme…Sot nuk u gjuajt asgjë nga ana e opozitës, sot u provokua me mjete demokratike performative një akt dhe një qëndrim i një grupi opozitar, apo u flladitë më mirë me thënë në këtë temë kryeministri dhe zëvendëskryeministri. Nxitja erdhi nga zv.kryeministri. Ju e provokuat dhunën dhe eskaluat situatën këtu. Kolegët tanë u mbrojtën këtu nga kolegët tuaj”, tha ajo.
Kritik ndaj pushtetit u shpreh edhe deputeti i AAK-së, Bekë Berisha, i cili e akuzoi Lëvizjen Vetëvendosje se praktikën e tensioneve në Kuvende e ka praktikuar vite me radhë sa ka qenë në opozitë.
“Kjo është një lloj metode, të cilën e keni praktikuar ju për vite me radhë. Madje ka qenë edhe më ekstreme. Kjo situatë ka qenë e pashmangshme, pasi sot këtu janë përballur dy ide të vjetra që kanë mbizotëruar në popullin tonë për vite me radhë. Kjo ka qenë e pashmangshme dhe do të ketë konflikt gjithmonë këtu derisa kjo ideja e mashtrimit ka me rezistuar me qenë në mesin tonë siç ka rezistu qysh ka qenë deri tani. Nuk mundet me u tejkaluar kjo situatë dhe të themi hajde tash flasim për ligje”, tha ai.
Megjithatë, në partinë në pushtet u shprehën të gatshëm të vazhdojnë seancën e sotme. Kjo bëri që deputetët opozitarë të bllokojnë foltoren e Kuvendit duke e pamundësuar vazhdimin e shqyrtimit të pikave që janë në rend të ditës.
/TV Malisheva
