Kryetarja e Kolegjiumit të Drejtorive Komunale të Arsimit, Besianë Musmurati, ka thënë se vendimi i fundit i Minsitrisë së Arsimit iu ka shkaktuar telashe e shqetësime drejtorive të arsimit.
“Me qefin më të madh do të jepnim informata qysh ka me ndodhë, po nuk po i dimë as ne qysh, po besoj, s’po i di as vetë Ministria. Më vjen keq që çdo shtator, pra është shtatori i dytë në Qeverinë Kurti që po fillon mësimi më këso barriera”, tha ajo në emisionin Frontal në T7.
Ajo thotë se çdo familje në Kosovë e di që mësimi fillon më 1 shtator dhe këtu s’ka hapësirë për befasi.
“Veç logjistika e aranzhimit të një diçkaje të tillë merr shumë kohë për planifikim. Nuk është një eksperiment që mund ta bëjmë 10 ditë para se të fillojë mësimi e aq më pak pa i njoftuar komunat sepse për neve është me të vërtetë… Ne mundohemi t’i qëndrojmë Ministrisë pranë kur ka politika të reja”.
Po ashtu, Musmurati tha se prindërit nëpër disa komuna do të kenë vështirësi shtesë për blerjen e librave meqë mungojnë libraritë. Këtu ajo përmendi Hanin e Elezit si shembull.
Për këtë çështje, Musmurati tha se ministrja e Arsimit, Arbërie Nagavci, i ka ftuar për një takim të martën të gjitha drejtoritë. Ajo konfirmoi se do t’i përgjigjen kësaj ftese.
/TV Malisheva
