Katër shkabave egjiptiane iu vendosën transmetues GPS në malet Rodope Lindore të Bullgarisë këtë verë. Të dhënat për lëvizjet e këtyre shpendëve do të ndihmojnë në mbrojtjen e specieve të tyre të rrezikuara globalisht, tha Shoqata Bullgare për Mbrojtjen e Zogjve (BSPB).
Dy nga zogjtë – Momchil dhe Sharko – janë përkatësisht 2 dhe 3 vjeç, një periudhë kur shkaba ende është duke u njohur me botën. Dy zogjtë e tjerë – Yana dhe Stenli – janë shkaba të rritura që folezojnë në malet e Rodopit Lindor.
Transmetuesit GPS u siguruan në kuadër të një programi për qëllim të ruajtjes së shkabës egjiptiane gjatë rrugës së saj të migrimit. Në kuadër të programit në 13 vitet e fundit, transmetues të tillë janë vendosur në mbi 90 shkaba në Bullgari, Greqi, Maqedoninë e Veriut, Shqipëri, Siri, Jordani dhe Etiopi.
Të dhënat e mbledhura në këtë mënyrë jo vetëm që kanë treguar rrugët kryesore të migrimit të specieve dhe vendndodhjet e tyre gjatë dimrit, por kanë ndihmuar gjithashtu në zbulimin e rasteve të helmimit, vendeve me vdekshmëri të lartë nga goditjet elektrike dhe shumë kërcënime të tjera.
Veprimet në shkallë të gjerë të ndërmarra për të kufizuar këto kërcënime përgjatë gjithë rrugës së migrimit kanë çuar tashmë në shenjat e para të stabilizimit të shkabave egjiptiane në Bullgari, tha BSPB.
Shkaba egjiptiane është një nga speciet më të rrezikuara të shpendëve në planet. Numri i këtyre shpendëve në Ballkan ka rënë me mbi 80% në 25 vitet e fundit për shkak të helmimeve, gjuetisë pa leje dhe goditjeve elektrike të shkaktuara nga rrjeti elektrik. Në Bullgari, përpjekjet për ruajtjen e kësaj specie kryhen në kuadër të projektit Egyptian Vulture New LIFE./BTA
/TV Malisheva
