Studiuesi dhe publicisti Daut Dauti nëpërmjet dokumenteve nga Arkivi Kombëtar Britanik, ka dëshmuar mbi origjinën shqiptare të Ahmet Hilmi Pashës, i cili ishte edhe Kryeministri e parë i Palestinës.
Këto dokumente që përbëjnë korrespondencën diplomatike të Foreign Office-it, flasin edhe për qeverinë e parë të Palestinës të formuar në vitin 1948. Ky është postimit i plotë i Daut Dautit.
“Këto dokumente janë nga Arkivi Kombëtar Britanik, që janë korrespondencë diplomatike e Foreign Office-it, dhe flasin për qeverinë e parë të Palestinës të formuar në vitin 1948. Kryeministër, siç shihet edhe në këto dokumente, ka qenë Ahmet Hilmi Pasha (1883-1963), një shqiptar i lindur në Sidon apo Saida të Libanit. Pasi që ishte shqiptar, arabët e quanin Ahmed Al Arnauti.
Hilmi Pasha ka qenë një lloj gjeniu në financa, por edhe në politikë dhe ushtri. Në Perandorinë Otomane ka shërbyer disa herë si ministër i financave dhe si ushtarak kishte gradën e gjeneralit. Pas rënies së Perandorisë Otomane, ai shërbeu si ministër dhe këshilltar i financave në disa vende arabe dhe është themelues i bankave të para arabe.
Pasi që gëzonte popullaritet të madh dhe pasi që kishte ndihmën e dinastisë shqiptare të Egjiptit, Hilmi Pasha u zgjodh kryeministër i qeverisë palestineze. Kjo qeveri kishte 8 ministra arabë të Palestinës, dy nga të cilët ishin të krishterë. Qeveria e Hilmi Pashës ka funksionuar disa vite, por ra nën hije dhe u bë e parëndësishme pasi që Amerika dhe disa vende evropiane kishin tjera plane, të cilat po shihen edhe sot”.
/TV Malisheva
