Përballjet me Shqipërinë dhe me Kosovën kanë qenë gjithmonë emocionuese për Xherdan Shaqirin dhe për Granit Xhakën.
Kjo për faktin se që të dy janë shqiptarë me rrënjë dhe u ballafaquan me dy vendet ku iu rreh zemra më fort.
Dy futbollistët nga Kosova do ta kenë një tjetër emocion të veçantë të shtunën mbrëma.
Ata do të ballafaqohen përsëri me Kosovën, me vendin e prindërve të tyre.
Por, këtë radhë, kjo lojë do të jetë mjaft e rëndësishme për ta.
Xhaka e Shaqiri në fakt duhet ta mposhtin Përfaqësuesen Dardane për ta siguruar kualifikimin në Kampionat Evropian.
Aktualisht, Zvicra është lidere e grupit me 16 pikë, sa i ka edhe Rumania, që është e dyta, kurse Izraeli mbetet në vendin e tretë me 12 pikë, dy më shumë se Kosova, e cila e zë vendin e katërt.
Për të mos i lënë vend rastësisë dhe befasisë në xhiron e fundit të Grupit I, “Helvetikët” duhet ta mposhtin Kosovën të shtunën në Basel.
Kosova do të ketë mungesa të mëdha, përfshirë këtu atë të Vedat Muriqit, Amir Rrahmanit e Edon Zhegrovës, i cili shkaktoi “tërmet” mbrëmë me postimin në rrjetet sociale.
Kurse, tek Zvicra po ashtu janë shfaqur probleme, mbi të gjitha zënka që thuhet se e pati Shaqiri me trajnerin Murat Yakin, i cili e la në bankinë yllin nga Kosova gjatë tërë ndeshjes me Izraelin.
E Xhaka ishte nervoz dhe i mërzitur për barazimin me izraelitët në Hungari mbrëmë, duke iu zbehur gëzimi që e pati para lojës për rekordin që e theu duke u bërë lojtari me më së shumti paraqitje në Kombëtaren zvicerane – 119 sosh.
/TV Malisheva
