Inspektorët kërkojnë nga Hidroregjioni Jugor, rregullimin e dëmeve që kanë bërë në rrugët e Malishevës
Malishevë, 23 shtator
Sot është mbajtur mbledhja e rregullt e Këshillit të Drejtorëve të qeverisë komunale në Malishevë, e drejtuar nga kryetari i Komunë së Malishevës, Ragip Begaj, ndërsa në këtë mbledhje, krahas raportimeve, është bërë e ditur se disa rrugë në territorin e Komunës së Malishevës, janë dëmtuar si pasojë e ndërhyrjeve nga njësia për menaxhimin e ujërave “Hidroregjioni Jugor”.
Sipas Drejtorisë së Inspektoratit dhe asaj të Urbanizmit, njësia e “Hidroregjionit Jugor” në Malishevë, gjatë intervenimeve të ndryshme në riparimin sistemit të ujësjellësit apo kanalizimit, ka dëmtuar rrugët apo trotuaret dhe nuk i ka kthyer në gjendjen e mëparshme pas kryerjes së punimeve. Për këtë qëllim, i është kërkuar kësaj kompanie, që rrugët apo trotuaret e dëmtuara, ti kthej në gjendjen e mëparshme.
Në mbledhjen e sotme, edhe Drejtoria e Shërbimeve Publike, ka bërë të ditur se kanë filluar me përgatitjet për mirëmbajtjen e rrugëve dhe trotuareve gjatë sezonit të dimrit, në qytet dhe në të gjitha rrugët në vendbanimet e Komunës së Malishevës.
Sa i përket realizimit të projekteve, sipas Drejtorisë së Urbanizmit, janë duke u realizuar në terren, disa nga projektet që kanë të bëjnë me infrastrukturën rrugore dhe të sistemeve të kanalizimeve.
Po ashtu në mbledhjen e sotme, zyrtari komunal i shërbimeve publike, Naser Morina, ka raportuar para qeverisë komunale, për trajnimin e kryer në Japoni dhe certifikimin e tij në fushën e “Avancimi i Teknologjive te Menaxhimit të Mbeturinave Inerte”, dhe i njëjti ka thënë se përvojat e marra në shtetin japonez, do të mundohet ti zbatoj edhe në Komunën e Malishevës, duke ju përshtatur kushteve tona. “Ka qenë një trajnim intensiv dy mujor, ku kam arritur ta kryej me sukses dhe të certifikohem në këtë fushë, ndërsa përvojën e marrë në Japoni, do ta barti edhe këtu, në mënyrë që ti menaxhojmë mbeturinat inerte në mënyrën më të mirë të mundshme”, ka thënë Morina, gjatë raportimit të tij.
