Analisti Neritan Alibali, dekriptoi takimet në Bruksel të Kurtit dhe Vuçiçit në kuadër të planit për normalizimin e marrëdhënieve.
Alibali tha se kryeministri Kurti luajti poker, duke pranuar propozimin e BE-së dhe duke e mundur Vuçiqin me “blof”.
Ai shtoi se tashmë Kosova është në një pozitë më të mirë ndërkombëtarisht, pasi Borrell ka dal në plan të dytë dhe për normalizimin e marrëdhënieve merren personalisht liderët e Francës, Gjermanisë dhe Italisë.
“Kurti luajti poker me Vuçiqin. E mundi me blof, për ata që e njohin lojën e pokerit. Pse e them këtë? Kurti e vuri në vështirësi Vuçiqin përpara tre udhëheqësve të vendeve kryesore të Evropës. E sfidoi duke thënë “të vijë dhe Vuçiq pasi jam gati të firmos planin gjerman dhe marrëveshjen e Ohrit”, duke e nxjerrë në një pozicion bllokues”, tha Alibali në Euronews Albania.
Sipas tij, ka një ndryshim shumë të madh tani.
“Nëse Evropa përpara Banjskës i besonte Borellit dhe Lajçakut, përfaqësuesit të dy vendeve që nuk e njohin Kosovën, Lajçaku ka votuar kundër Kosovës në organizata të ndryshme ndërkombëtare, ndërsa Borrellit o duket Kosova si Katalunja dhe Kurti si shefi i separatistëve, tani janë drejtuesit e tre vendeve të BE-së që e kanë njohur Kosovën dhe 3 vendeve të fuqishme të G7, që po merren me normalizimin e marrëdhënieve”.
“Çështja është këtu që pozicioni i Kosovës është shumë më i mirë se çfarë ka qenë më përpara. BE hoqi Borrellin, armikun më të madh të Kosovës tani dhe i vendosi Kosovën dhe Serbinë në pozita të barabarta. Më përpara akuzohej Kosova dhe vetëm Kosova”, tha Alibali.
/TV Malisheva
