Kreu i PD-së Lulzim Basha ka postuar në rrjetet sociale disa foto të selisë blu, ku u shënuan incidente në protestën e dhunshme të thirrur nga ish kryeministri Sali Berisha.
Ai ka postuar foto nga dëmtimet në godinën e selisë blu, ndërsa bashkangjitur jep edhe një mesazh të shkurtër për Sali Berishën: “Atë që shkatërroi ai, ne do ta ngremë më të fortë”.
Ish-kryeministri Berisha thirri mbështetësit e tij me datë 8 janar, para oborrit të selisë së PD-së, në një protestë kundër kryetarit të Partisë Demokratike, Lulzim Basha. Aktet e dhunës nisën shumë më herët se të mbërrinte ora 12:00, e paralajmëruar si momenti i nisjes së protestës.
Dera kryesore e selisë u hap me forcë, përpara se ish-kryeministri të mbërrinte në oborrin e selisë së PD-së. Edhe dritaret në katin e parë të godinës u hapën gjithashtu me forcë, duke thyer xhamat. Protestuesit u ndalën në pjesën e hollit, ku u gjendën përpara dyerve të tjera të përforcuara me veshje hekuri.
Qëllimi i deklaruar më herët ishte të largonin nga selia kryetarin e Partisë Demokratike, pas vendimeve që ai kishte marrë kundër ish-kryetarit Sali Berisha, i shpallur non grata nga SHBA për korrupsion dhe cenim të demokracisë.
Protestuesit dhunuan më herët, anëtarin e kryesisë Roland Bejko dhe nuk e lejuan të hynte në selinë qendrore të partisë, ndërsa ai u largua nga sheshi mes goditjeve dhe sharjeve.
Ata kishin marrë me vete edhe shkallë metalike për të depërtuar në katin e dytë nga fasada kryesore, ku kanë qëlluar me gurë e sende të forta. Mbështetësit e ish-kryeministrit provuan të hyjnë nga drejtime të ndryshme, por gjithçka dukej e pamundur.
Një tentativë e disa personave që me anë të shkallëve u ngjitën në katin e dytë, në një ballkon në krahun e majtë, u zmbraps, nga disa persona brenda godinës. Një prej protestuesve mbeti i plagosur në kokë. Përpjekjet e tjera po ashtu u zmbrapsën, ndërsa nga brenda godinës u përdor gaz për t’i mbajtur ata larg. Një derë e blinduar në krahun e djathtë të godinës u arrit të hapej.
Disa organizatorë me megafon nxitën pjesëmarrësit e pozicionuar më larg, që të afroheshin përqark selisë së PD-së për të vazhduar protestën. Forcat e policisë ndërhynë në një kohë të shkurtër duke përdorur gazin lotsjellës.
Mbështetësit e Berishës u shpërndanë me shpejtësi dhe njësitë e policisë morën kontrollin e godinës së PD-së, duke u rreshtuar të shumtë në numër në hyrje të saj.
Prokuroria e kryeqytetit e rrethoi zonën si një skenë krimi dhe për disa orë oficerët e policisë gjyqësore dokumentuan aktet e dhunës.
Ndërkohë dhjetëra persona janë shoqëruar në komisariate./TV Malisheva
