“Kryeministri Rama është nën hetim ndërkombëtar, pas hetimit që është hapur në SHBA ndaj ish-drejtorit të kundërzbulimit të FBI-së, Charles McGonigal”. Kështu u shpreh kryetari i Partisë Demokratike, Sali Berisha këtë të premte në një deklaratë për mediat nga selia blu.
Berisha tha se Rama është nën hetim për shkak se në emailin zyrtar të McGonigal, është gjetur një email privat i tij, ku i kërkonte që t’i gjente një kompani për një problem antikorrupsioni.
“Ky McGonigal ishte në ekipin e Myler, por hetohet vetë për lidhjet me rusët. Gjykatësi urdhëron çdo regjistrim dhe material në posedim, që dokumentojnë çdo komunikim personal, përfshi, por jo të kufizuar, tekstet e mesazheve celulare, emailet elektronike, mesazhet zanore, letra, shënime, midis Charles McGonigal për çështjet që vijojnë, përfshi kryeministrin Edi Rama.
Në emailin zyrtar të McGonigal gjendet një email privat i Edi Ramës. Edi Rama i kërkonte mikut të tij, McGonigal t’i gjente një kompani për një problem antikorrupsioni. Por FBI e ndalon kategorikisht këtë gjë. McGonigal ndërkohë, erdhi në Shqipëri, regjistroi kompaninë e tij të biznesit, pra më thoni ju mua, a është ky mandati i gjykatësit?”, theksoi kryedemokrati./Euronews Albania/
