Presidenti bullgar Rumen Radev tha se vendi i tij nuk do t’i përgjigjet asnjë ultimatumi për të mbështetur bisedimet e pranimit në BE midis Maqedonisë së Veriut dhe Brukselit.
Bullgaria vuri veton për fillimin e bisedimeve të anëtarësimit me Maqedoninë e Veriut në fund të vitit 2020, duke thënë se vendi nuk po zbatonte një traktat dypalësh të nënshkruar në 2017.
“Është jashtëzakonisht e papërshtatshme dhe jo e dobishme t’i jepen Bullgarisë ultimatume,” u tha Radev gazetarëve në Sofje, duke komentuar një deklaratë të ministrit të Jashtëm të Maqedonisë së Veriut, Bujar Osmani.
Sipas medias bullgare, Osmani thuhet se ka thënë se deri në qershor, pra deri në fund të presidencës franceze të BE-së, ekziston mundësia e zhvillimit të lidhjeve mes Bullgarisë dhe Maqedonisë së Veriut.
Radev këmbënguli se duhet të respektohen parakushtet për fillimin e bisedimeve për anëtarësim. Vetoja preku edhe fillimin e bisedimeve të BE-së me Shqipërinë, të cilat gjithashtu janë të bllokuara.
Ai foli për një presion të jashtëm ndaj Bullgarisë dhe akuzoi Maqedoninë e Veriut për shkelje të të drejtave të njeriut (të bullgarëve etnikë), shkelje të kritereve të Kopenhagës dhe përdorimin e gjuhës së urrejtjes. “Kjo është e papajtueshme me parimet dhe vlerat evropiane”, tha ai.
Sipas kritereve të Kopenhagës, shtetet duhet të plotësojnë disa kushte nëse duan të anëtarësohen në Bashkimin Evropian, si për shembull të kenë institucione për të ruajtur qeverisjen demokratike dhe të drejtat e njeriut. /ATSH
/TV Malisheva
