Cilësia e ulët e pijeve alkoolike po sjell probleme në shëndetin e shqiptarëve.
Kreu i Shoqatës së Mbrojtjes së Konsumatorëve, Hasan Stafa, tha se në vitin 2018 ka pasur 14 raste intoksikimi nga konsumimi i pijeve alkoolike, ndërsa kujtoi se në vitin 2012 është shënuar dhe humbje jete.
Abuzimi me cilësinë e pijeve alkoolike ka sjellë problematika në shëndetin e shqiptarëve.
Në një intervistë për RTV Ora, kreu i Shoqatës së Mbrojtjes së Konsumatorit, Hasan Stafa, ngriti shqetësimin se gjatë vitit 2018 ka pasur 14 raste intoksikimi nga përdorimi i alkoolit jashtë standardit.
“Janë produktet informale, një pjesë nga trashëgimia tradicionale që ka Shqipëria në prodhimin e alkoolit dhe pjesa tjetër pas viteve ’90 që janë amatorë në këtë fushë bëjnë që kjo situatë të jetë jashtë kontrollit. Format abuzive janë përdorimi i alkoolit ushqimor dhe stimulantëve si sheqeri, dhe përdorimi i shufrave për të pulsuar dhe rritur gradacionet e këtij produkti”, ka thënë ai.
Stafa shprehet se për rastet e abuzimit ka patur dhe bllokime, pasi në vitin 2012 konsumimi i alkoolit ka shënuar dhe humbje jete në Dibër.
