Kryeministri i Kosovës, Albin Kurti, tha se nga marrëveshja bazike, Kosova përfiton njohjen de facto nga ana e Serbisë, por kjo e fundit sipas tij, nuk po e zbaton dhe po e shkelë atë.
“Marrëveshja bazike është njohje de facto. Problemi është që Serbia nuk po e zbaton dhe po e shkelë. Marrëveshja bazike është njohje de facto. Ajo duhet respektuar dhe duhet zbatuar. Në vend që të respektohet dhe të zbatohet, Serbia as s’po e zbaton edhe po e shkelë. Nuk më përket e vetëm mua të flas si palë në anën tjetër të tryezës, i përket ndërmjetësve që ta thonë këtë gjë hapur”, tha Kurti.
Ai kritikoi ndërmjetësuesit se nuk po e ndëshkojnë Serbinë për shkelje të marrëveshjes.
Nëse marrëveshja është valide, e pa tjetër që është valide, atëherë pala e cila e shkelë do të duhej ta dëgjonte vërshëllimën e arbitrit, referit që nuk guxon të vazhdohet me dhunim të marrëveshjes siç po bën presidenti i Serbisë, qoftë atëherë kur votoi me 24 prill kundër anëtarësimit të Kosovës në Këshillin e Evropës apo edhe atëherë kur po bënë sulme terroriste e kriminale e që i sponsoron sikurse në Banjskë të Zveçanit me 24 shtator”, tha Kurti
Ai thotë se mos nënshkrimi i kësaj marrëveshje është keqpërdorur nga Beogradi.
“Unë kam insistuar në nënshkrim për shkak se pikërisht, mos nënshkrimi është keqpërdorur nga Beogradi. Ne kemi marrëveshje dhe ajo është pjesë e konkluzioneve të mbledhjeve të Këshillit Evropian, mirëpo Serbia edhe po e shkelë edhe nuk po e zbaton. Nënshkrimi është ai i cili praktikisht i anulon shkeljet e më hershme dhe parandalon shkelje të reja. Kjo është arsyeja pse unë kam insistuar, përveç faktit që me 9 shtator të vitit të kaluar, kur ma kanë sjellë draftin e parë të marrëveshjes bazike, gjithmonë është folur se në fund bëhet fjalë për një normalizim midis palëve kontraktuese që merren vesh me nënshkrimin që japin. Pra unë kam pranuar të nënshkruaj, mirëpo nënshkrimi është pranim dhe është garancion për zbatim”, tha Kurti.
Kurti tregoi se draft-statuti i Asociacionit të komunave me shumicë serbe i propozuar nga pesëshja e emisarëve ndërkombëtarë, është më i avancuar se ai i viteve 2013 e 2015.
“Me datën 21 tetor erdhi pesëshja e emisarëve, e cila erdhi për draft statutin e Asociacionit të Komunave me Shumicë Serbe, dhe aty me 24 tetor, unë ua dërgova vërejtjet për atë draft statut. Është e çartë se ai draft statut është pakrahasimisht më i avancuar se siç kanë qenë në 2013 e 2015. Këtu janë çështjet e përmbajtjes, por unë do të thosha që kryesorja është se ky draft statut fillon me atë se në çfarë shteti ndodh kjo gjë. Pra, së pari kemi një pranim të thelbit dhe të kornizës e që është shteti demokratik, Republika e Pavarur e Kosovës dhe në anën tjetër, megjithatë, unë kam dërguar vërejtjet, komentet, kritikat e mia për këtë draft me datën 24 tetor, me qenë se natyrisht nuk është një draft i cili do të shkruhej prej meje saktësisht asisoj”, tha ai.
Kurti thotë që dallimi kryesor tij është korniza, që sipas kryeministrit, është themeli se ku ky draft beson që do të zbatohet.
“Për këtë arsye, edhe unë kam thënë se është i pakrahasueshëm me të tjerët, që përafroheshin në Bruksel në vitin 2013 dhe 2015 dhe ku në fakt nuk kishte barazi midis palëve”, tha ai ndër të tjera.
Ndërkaq, në një intervistë tjetër të dhënë gjatë ditës së djeshme për televizionin publik austriak “ORF Tv Thek”, Kurti tha se nuk ka shanse që një Republikë Srpska të bëhet brenda Kosovës, siç tha ai “ka ndodhur në Bosnjë dhe Hercegovinë”. Sa i përket draft-statutit të Asociacionit, Kryeministri Kurti tha se ai vetë kishte ofruar që ta shkruante një të tillë gjithmonë duke respektuar Kushtetutën.
“Jam unë që në fakt u ofrova të shkruaj draft statut për vetëmenaxhimin e komunitetit serb në përputhje me marrëveshjen e mëparshme. Duke u ofruar për atë që duhet të respektojë Kushtetutën e Kosovës, e vendimi i kushtetutës është gjykata, qëndrimet e Bashkimit Evropian se ky Asociacion i shumicës serbe nuk duhet të ketë kompetenca ekzekutive, dhe qëndrimet amerikane të publikuara me tekste të përbashkëta nga Chollet dhe Escobar, në janar të këtij viti”, tha Kurti.
Kurti ka thënë se Serbia nuk është e interesuar për implementimin e marrëveshjeve, por në të kundërtën është e angazhuar për eskalim.
Kurti ka thënë se nevojitet më shumë presion mbi shtetin serb, i cili siç u shpreh Kurti, por e shfrytëzon dialogun, për të forcuar aparatin e tyre policor dhe ushtarak, të cilin e përdorin kundër Republikës së Kosovës.
“Marrëveshja për të cilën jemi pajtuar më 27 shkurt dhe pastaj për aneksin e zbatimit më 18 mars, por Serbia refuzoi ta nënshkruajë është njohje de facto e Kosovës.
Sidoqoftë, përderisa Serbia refuzon të nënshkruajë pavarësisht se është pajtuar me tekstin, ata nuk janë të angazhuar për implementimin dhe në të kundërtën janë të angazhuar për eskalim. Nuk mendoj se marrëveshja ka vdekur, por kemi nevojë për më shumë presion mbi regjimin autokratik të Serbisë, e cila nuk i përmbahet asaj që ata janë pajtuar dhe e shfrytëzon dialogun si dhe përdorin dialogun për të forcuar aparatin e tyre policor dhe ushtarak, të cilin e përdorin kundër Republikës së Kosovës”, u shpreh Kurti.
/TV Malisheva
