Deklarata e presidentit amerikan Joe Biden se mizoritë që po ndodhin tani në Ukrainë janë një “gjenocid” nuk pritet të shkaktojë ndonjë ndryshim të menjëhershëm në politikën e SHBA-së ndaj konfliktit, sipas zyrtarëve amerikanë të njohur me këtë çështje.
Biden e bëri të qartë në Iowa se ai beson se presidenti rus Vladimir Putin po kryen gjenocid në Ukrainë, por tha se ai “do t’i linte avokatët të vendosin” për ta përdorur emërtimin ndërkombëtarisht.
Ky ishte një sinjal që SHBA nuk po bën një deklaratë zyrtare të gjenocidit në Ukrainë, thanë zyrtarët. SHBA ka bërë vetëm tetë përcaktime formale të gjenocidit, më së fundi duke etiketuar persekutimin e minoritetit Rohingya nga Mianmar si gjenocid.
Një veprim i tillë do të nxiste detyrimin ligjor sipas Konventës së Kombeve të Bashkuara për Gjenocidin, i cili do t’u kërkonte vendeve të ndërhynin për të parandaluar përparimin e gjenocidit.
Tashmë, përdorimi i fjalës gjenocid nga Biden ka sjellë disa goditje nga një aleat kyç i SHBA-së.
“Dua të vazhdoj të përpiqem, sa më shumë që të mundem, për të ndalur këtë luftë dhe për të rindërtuar paqen. Nuk jam i sigurt se një përshkallëzim i retorikës i shërben kësaj kauze”, tha sot presidenti francez Emmanuel Macron, transmeton CNN.
/TV Malisheva
