Ne e kemi luftuar pandeminë për më shumë se dy vjet, por ka ende një sërë të panjohurash, veçanërisht kur bëhet fjalë për pasojat afatgjata të sëmundjes, e cila mori edhe emrin – postcovid.
Ndër këto përmenden rënia e flokëve, qerpikëve, por edhe rritja e dobët e mjekrës. Hulumtimet mbi pacientët e shtruar në spital kanë treguar se ky është një efekt anësor i zakonshëm dhe disa e luftojnë edhe disa muaj pasi janë liruar për trajtim në shtëpi.
Në Institutin e Trikologjisë (një degë e dermatologjisë që studion strukturën dhe sëmundjet e flokëve) në Britaninë e Madhe, rreth 79 për qind e pacientëve raportuan rënie të shtuar të flokëve pas shërimit nga COVID-19.
Ekspertët besojnë se koronavirusi nuk ndikon drejtpërdrejt në rënien e flokëve.
“Rënia e flokëve pas infeksionit me COVID-19 ndodh për shkak të infeksionit tepër aktiv në trup. Inflamacioni, jo vetë virusi, shkakton ndryshime në flokë pasi kimikatet e trupit kombinohen për të luftuar infeksionin, kështu që humbja e parakohshme dhe e tepruar e flokëve mund të ndodhë lehtësisht”, shpjegon Alexis Young, një dermatolog pranë Qendrës Mjekësore të Universitetit Hackensack.
Ai shton se rënia e flokëve pas çdo periudhe stresuese është e zakonshme, qoftë kjo një ngjarje e lumtur siç është lindja e një fëmije apo një ngjarje stresuese siç është një operacion i madh.
Kur ndodh rënia e flokëve?
Si rregull, flokët fillojnë të bien dy deri në tre muaj pas infeksionit fillestar me koronavirus ose 50 deri në 60 ditë pas diagnozës. Është e vështirë të thuhet se sa mund të zgjasë, pasi ndryshon nga personi në person, theksojnë ekspertët. Megjithatë, ata vunë re se rënia e flokëve mund të zgjasë deri në 18 muaj pas sëmundjes.
Lajmi i mirë është se flokët mund të rriten plotësisht, pa asnjë ndihmë apo trajtim.
Çfarë duhet bërë në një situatë të tillë?
Sigurisht, një dietë e shëndetshme dhe marrja e duhur e vitaminave mund të jetë e rëndësishme për rikuperimin e flokëve, por në radhë të parë duhet shmangur sa më shumë stresi.
Ekspertët theksojnë se nuk ka asnjë provë që vitamina e njohur B do të ndihmonte flokët të rriteshin më shpejt, por vini re se ajo është dëshmuar e dobishme dhe mund të gjendet në mish, peshk, arra dhe perime si patatet e ëmbla dhe spinaqi.
