Sot ka filluar rehabilitimi i sheshit “Adem Jashari” në Skenderaj dhe ndërtimi i trotuarit e ndriçimit publik në qendrat e bashkësisë lokale të Prekazit dhe Qirezit, projekte këto që bashkë financohen nga Ministria e Administrimit të Pushtetit Lokal dhe Demos nga njëra anë dhe komuna e Skenderajt nga anë tjetër, në kuadër të grantit të performancës, grant ky të cilin komuna e Skenderajt e ka fituar si rezultat i qeverisjes së mirë.
Me këtë rast, Kryetari i komunës së Skenderajt, Bekim Jashari, priti në takim dy zv. ministret e MAPL-së, Fatbardha Emini dhe Magbule Shkodra bashkë më të cilat vizituan punimet në realizimin e këtyre dy projekteve.
Kryetari Jashari, në ceremoninë e fillimit të dy projekteve në fjalë falënderoi Ministrinë e Administrimit të Pushtetit Lokal për mbështetjen e dhënë dhe u shpreh i lumtur që si rezultat i qeverisjes së mirë të komunës që ai udhëheq këtë vit do të realizohen 3 projekte, të cilat kapin vlerën totale prej 265 mijë euro, prej të cilave 207 mijë janë shpërblim nga granti i performancës kurse 58 mijë janë bashkëfinancim nga komuna e Skenderajt.
Duke folur rreth rehabilitimit të sheshit “Adem Jashari”, i cili kap vlerën totale prej 75 mijë euro kryetari Jashari theksoi se ky projekt është i mirëseardhur pasi që me të do të rehabilitohen disa nga pjesët ë dëmtuara të sheshit si dhe instalimi i sistemit të ujitjes dhe ndriçimit, duke u pasuruar edhe me pjesë të gjelbërimit dhe rekreacionit.
Sa i përket projektit të ndërtimit të trotuarit e ndriçimit publik në qendrat e bashkësisë lokale të Prekazit dhe Qirezit, kryetari Jashari deklaroi se ky projekt i cili kap vlerën totale prej 115 mijë euro do të mundësojë kushte më të mira të lëvizjes së qytetarëve dhe me theks të veçantë të nxënësve të këtyre dy bashkësie lokale.
Tutje Jashari, deklaroi se në kuadër të shpërblimit që ka fituar komuna e Skenderajt nga granti i performancës, ditët në vijim do të fillojë dhe projekti tjetër i ndërtimit të poligonit sportiv në Skenderaj, i cili do të krijojë kushte më të mira sportive e rekreacioni për fëmijë dhe të rinjtë të lagjes 2 të qytetit tonë.
Nga ana tjetër, zv. ministret e MAPL-së, Fatbardha Emini dhe Magbule Shkodra, pasi përgëzuan kryetarin Jashari për angazhimin e tij në zhvillimin e komunës së Skenderajt, premtuan përkrahje edhe në realizimin e projekteve tjera.
Në kuadër të kësaj vizite në Skenderaj, zv. ministret Emini e Shkodra, bashkë me kryetarin Jashari bënë homazhe nderimi tek Kompleksi Memorial “Adem Jashari”, në Prekaz./Tv Malisheva
