Më shumë se 700 fosile zogjsh, që datojnë nga 54 deri në 56 milionë vjet më parë, i janë dhuruar Muzeut Kombëtar të Skocisë.
Koleksioni besohet të përfshijë shumë specie të reja për shkencën, njëra është një zog i ngjashëm me skifterin dhe tjetri një zhytës.
Mostrat e rralla u mblodhën gjatë jetës së entuziastit amator të paleontologjisë Michael Daniels, i cili vdiq vitin e kaluar në moshën 90-vjeçare.
Artikujt janë të pazakontë për sa i përket fosileve të shpendëve pasi ato ruhen në 3D.
Fosilet nga periudha e Eocenit përfaqësojnë fazat e hershme të evolucionit të zogjve modernë.
Një karakteristikë e dukshme e asaj periudhe është se klima globale ishte disa gradë më e ngrohtë se sa sot, që do të thotë se ekzemplarët mund t’u japin shkencëtarëve informacione të dobishme rreth ndryshimeve klimatike.
Ekspertët besojnë se koleksioni mund të prodhojë të paktën 50 specie të reja pasi të përfundojë kërkimi.
Paleontologu Gerald Mayr nga Instituti i Kërkimeve Senckenberg, Frankfurt, vizitoi Daniels shumë herë për të parë fosilet që kishte mbledhur gjatë dekadave.
“Nuk ka asgjë të tillë në Mbretërinë e Bashkuar, sigurisht, dhe është e krahasueshme me vendet e tjera të pasura me zogj në SHBA, Kinë dhe Gjermani. Fakti që kaq shumë ekzemplarë ruhen në 3D, e bën këtë një nga koleksionet më të rëndësishme të llojit të tij në botë”, tha ai.
Koleksioni tani po i nënshtrohet punimeve të konservimit dhe ruajtjes në Qendrën Kombëtare të Koleksionit të Muzeve në Edinburg./TV Malisheva
