Mijëra protestues kundër masave kufizuese të pandemisë u mblodhën të shtunën në Berlin, ku e shpallën fundin e koronavirusit.
Kjo protestë erdhi pikërisht në kohën kur autoriteteve u janë shtuar shqetësimet për rritjen e numrit të rasteve të reja, shkruan “AP”.
Një grup njerëzish që fishkëllenin dhe brohorisnin, pak prej tyre me maska, marshuan nëpër qendrën e Berlinit nga Porta e Brandenburgut për të vazhduar drejt Parkut “Tiergarten”.
Protestuesit u panë duke mbajtur në duar pankarta ku shkruhej “Korona, alarm i rremë”, “Mbrojtje natyrale në vend të vaksinimit” dhe “Jepini fund panikut korona – kthejini të drejtat themelore”.
Ata gjithashtu u dëgjuan duke brohoritur “Jemi këtu dhe jemi të zëshëm, sepse po na rrëmbehet liria”.
Ndryshe, Gjermania gjatë 24 orëve të kaluara i ka shënuar 955 raste të reja të koronavirusit dhe shtatë viktima. Këto shifra janë dukshëm më të larta në krahasim me disa javë më parë, kur numri mesatar i rasteve ditore ishte rreth 500./Tv Malisheva
