Grupi për Studime Juridike dhe Politike (GLPS) ka publikuar sot të gjeturat e Raportit të Progresit të Komisionit Evropian, me ç’rast u tha se Kosova nuk ka arritur rezultate të dëshirueshme.
Kjo pasi sipas tyre, Kosova nuk ka arritur ndonjë reformë të thellë strukturore në krahasim me vendet e tjera të rajonit. Ndërkohë GLPS ka bërë të qartë qëndrimin e saj sa i përket kërkesës për themelimin e Asociacionit të komunave me shumicë serbe.
Derisa Komisioni Evropian në “Raportin për vendin” e konsideron shqetësuese iniciativën e Qeverisë së Kosovës për vetting të plotë në sistemin gjyqësor, sipas GLPS-së një reformë e tillë në sistemin e drejtësisë është e domosdoshme, por që e njëjta duhet të bëhet në koordinim të plotë me faktorin ndërkombëtar.
Njomza Arifi nga GLPS në një konferencë për media, tha se Qeveria e Kosovës duhet të bëjë më shumë për të arritur rezultate konkrete në reformat kyçe, si dhe në përmbushjen e obligimeve që dalin nga Marrëveshja për Stabilizim-Asociim (MSA) dhe Agjenda për Reforma Evropiane.
“Kosova, fatkeqësisht, nuk veçohet për ndonjë reformë të thellë strukturore për të cilën janë arritur rezultate të dëshirueshme siç ndodh me vendet e rajonit… GLPS rekomandon që Qeverisë të Kosovës të bëjë përpjekje të shtuar dhe një koordinimin ndër-institucional për të shënuar rezultate konkrete në disa nga reformat kyçe siç janë sundimi i ligjit, lufta kundër krimit të organizuar dhe korrupsionit, reforma në administratë publike si dhe të ketë një angazhim të shtuar në përmbushjen e obligimeve që dalin nga MSA dhe Agjenda për Reforma Evropiane”, tha ajo.
Ndërsa Arbër Fetahu nga GLPS, tha se një reformë e thellë në sistemin e drejtësisë përmes vettingut mbetet e domosdoshme.
“Ne si GLPS konsiderojmë që një reformë e thellë në sistemin e drejtësisë përmes vettingut mbetet e domosdoshme, por që e njëjta duhet të bëhet në koordinim dhe përfshirje të plotë të faktorit ndërkombëtar në të gjitha fazat e tij”, tha ai.
Sa i përket kërkesës së Komisionit Evropian për themelimin e Asociacionit me komuna serbe, Fetahu tha se është një nga çështjet në të nxehta që do ta karakterizojë dialogun. Ai tha se një asociacion me kompetenca ekzekutive e minon funksionalizimin e shtetit të Kosovës.
“Duhet të merret parasysh një qëndrim i përbashkët i të gjitha partive politike, ndoshta duhet të shkohet më tutje edhe me shoqërinë civile, akademinë por edhe me një prezencë qytetare për të parë se cili është pozicioni dalës nga kjo gjendje pasi që edhe marrëveshjet ndërkombëtare janë të obligueshme që të zbatohen, por fati ynë është që Gjykata Kushtetuese e hedh poshtë, (asociacionin) me kompetenca ekzekutive… Nuk mjafton ta refuzojmë apriori, ndoshta Kosova duhet të krijojë kundërpeshë në dialog de t’i ketë levat e veta sesi të dalë nga kjo gjendje… Një asociacion me kompetenca ekzekutive e minon funksionimin e brendshëm të funksionimit të Kosovës, pasi që në njëfarë forme krijohet një pushtet i tretë”, tha Fetahu. /TV Malisheva
