Legjenda e Barcelonës, Andres Iniesta, nuk ka humbur akoma besimin te Antoine Griezmann dhe Frenkie de Jong.
De Jong dhe Griezmann transferoheshin te Barcelona duke bërë bujë të madhe, por paraqitjet e tyre nuk ishin më të mirat të mundshme.
Lojtarët nuk u aktivizuan në pozitat e tyre të preferuara, ato ku luanin në skuadrat paraprake, dhe adaptimi për ta ishte më i vështirë.
Megjithatë, ish mesfushori i Barcelonës, Andres Iniesta, akoma beson se dy lojtarët do të korrin sukses te Barca.
“De Jong vetëm sa është transferuar dhe ai është akoma në procesin e adaptimit. Por, edhe Barca duhet të qartësoj stilin e lojës”, ka thënë Iniesta, transmeton lajmi.net.
“Sa i përket Griezmann, është çështje e ngjashme me atë të De Jong. Griezmann dhe gjithë të tjerët që kanë ardhur, iu duhet kohë”, ka shtuar spanjolli.
“Ata kanë talent të madh dhe do të përfundojnë me sukses duke bërë një vend për veten e tyre në këtë skuadër, ku nuk është e lehtë të luash”, ka thënë ndër të tjerash Iniesta.
De Jong transferohej te Barcelona për 75 milionë euro, kurse për kartonin e Griezmann paguheshin 120 milionë euro.
