Izolimi për shkak të koronavirusit e ka ndërruar mënyrën se si zhvillohen takimet dhe intervistat, madje edhe mënyrën se e si punohet pasi që disa kompani kanë filluar që ta praktikojnë më shumë të punuarit nga shtëpia. Madje, disa intervista pune po zhvillohen virtualisht. Veçmas në ato kompani të cilat ofrojnë mundësi punësimi nga shtëpia.
Sipas një studimi të fundit të menaxherëve të punësimit, rekrutuesve dhe profesionistëve të burimeve njerëzore, një e treta e punëdhënësve (33 për qind) i kryejnë intervistat e tyre të punës tërësisht përmes videokonferencës. 21 për qind të tjerë thonë se e fillojnë procesin e intervistës virtualisht dhe ofrojnë vetëm intervista ballë për ballë në raundet përfundimtare. Vetëm 21 për qind thanë se shumica e intervistave të punës në kompaninë e tyre ndodhin personalisht.
Sondazhi u kërkoi të anketuarve të renditnin 11 lloje të gabimeve që aplikantët bëjnë në intervistat me video, nga më të dëmshmet për punësim deri te ato më pak të dëmshme. Lajmi i mirë është se defektet teknike, të tilla si wi-fi jostabil, u renditën poshtë në listë, duke u renditur në vendin e dhjetë. Por disa probleme të tjera të zakonshme mund të pengojnë gjetjen e vendit të punës.
Sipas sondazhit këtu janë pesë gabimet kryesore që duhen shmangur në një intervistë pune, shkruan Akademi Pune.
1.Shmangia e kontaktit me sy ose shikimi në hapësirë
Ju mund të keni praktikuar shumë shpesh “Zoom”-in dhe aplikacione të tjera për videokonferencë vitet e fundit, por është e rëndësishme të mbani mend se një intervistë pune me video nuk është thjesht një tjetër takim apo bisedë me miqtë. Punëdhënësit duan të shohin që ju jeni të përqendruar në bisedë, kështu që mbani sytë te kamera.
2.Mos rrini ulur në një dhomë të çrregullt
Kur shkoni në një intervistë pune ku takoheni personalisht me intervistuesin, ju merrni një përshtypje se si duken zyrat, kush punon dhe si mund të ndiheni atje. Intervistat virtuale mund të jenë pikërisht e kundërta. Nëse nuk vendosni të turbulloni ose personalizoni sfondin tuaj, punëdhënësi mund të shohë hapësirën tuaj të punës dhe të gjykojë se çfarë thotë ajo për ju. Kjo do të thotë që nëse zgjidhni të bëni intervistën në shtëpinë tuaj, sigurohuni që të rregulloni zyrën tuaj duke i kushtuar rëndësi çdo gjëje që do të shfaqet në kamera. Nëse nuk mund ta siguroni një hapësirë të tillë atëherë të keni parasysh përdorimin e një dhome takimesh në bibliotekën tuaj publike ose hapësirë të ngjashme të komunitetit që mund të rezervohet falas.
3.Mos lini të aktivizuara aplikacione që mund të tingëllojnë
Përpara se të hapni aplikacionin e takimit për intervistën tuaj virtuale, është mirë të mbyllni të gjitha programet e tjera që mund të përdorni. Ju gjithashtu duhet të çaktivizoni të gjitha tingujt e postës elektronike dhe mesazheve që mund të ndërpresin bisedën. Nëse telefoni ju tingëllon vazhdimisht atëherë do të dukeni shumë joserioz dhe pafokus në intervistë.
4.Përdorimi i një sfondi joprofesional
Nëse vendosni të përdorni një imazh në vend që të mjegulloni sfondin ose të tregoni dhomën ku ndodheni, zgjidhni diçka të thjeshtë. Shmangni fotot familjare, fotot e pushimeve, karikaturat, memet dhe të ngjashme që mund të prishin bisedën e cila duhet të jetë e përqendruar se pse jeni personi më i mirë për këtë punë. Në vend të kësaj, mund të zgjidhni një dizajn të thjeshtë ose një ngjyrë të ngrohtë.
5.Ndërprerja nga familjarët e kandidatit
Miqtë dhe familja juaj mund t’ju ndihmojnë të praktikoni intervistën tuaj të punës dhe të përsosni nivelin tuaj. Por pasi të ketë filluar intervista virtuale, është më mirë t’i mbani ato larg syve dhe veshëve. Në dhomën ku po zhvilloni intervistën është mirë të jeni vetëm ju dhe të mos keni pengesa të tjera apo pëshpërima. /AkademiPune
/TV Malisheva
