Viti 2020 në Kosovë do të mbahet mend si vit i kobshëm pasi mori me vete edhe disa nga artistët më të mëdhenjë në fushën e muzikës e teatrit.
Ikona e muzikës shqiptare, Nexhmije Pagarusha u nda nga jeta në shkurt të këtij viti në moshën 86 vjeçare duke lënë pas një krijimtari të larmishme të me këngët e saj.
Në mars u shua edhe një emër i madh i teatrit dhe filmit, aktorja Leze Qena u nda nga jeta në moshën 85 vjeçare. Ajo do të mbahet mend për shfaqjet e panumërta në teatër dhe rolet e saj shumë të dashura në filmat dhe serialet vendore.
Në shtator të këtij viti vdiq edhe aktori tjetër i njohur Adem Mikullovci, në moshën 81 vjeçare.
Mikullovci la pas vetës një numër të madh rolesh teatrale dhe projekte filmike.
Ndryshe aktori me origjinë nga Mitrovica ishte edhe delegat i Kuvendit të Kosovës në kohën e shpalljes së Deklaratës së 2 korrikut, 1990, me të cilën Kosova është definuar si republikë.
Rapsodi i njohur Isë Llapqeva u nda nga jeta në shtator të këtij viti. Llapqeva vdiq në moshën 76 vjeçare.
Në tetor vdiq edhe kompozitori i njohur me prejardhje nga Gjakova, Avni Mula. Mula u nda nga jeta në moshën 92 vjeçare.
Dita e djeshme ishte e hidhur për dashamirët e këngës, pasi doajeni i muzikës shqipe, Ismet Peja mbylli sytë përgjithmonë në qytetin e Gjakovës. Këngëtari Peja me një karrierë 60 vjeçare, u nda nga jeta në moshën 83-vjeçare, duke lënë pas vetës një repertoar të bujshëm të këngëve tradicionale shqiptare. /TV Malisheva
