Kryetari i Komunës së Malishevës, Ragip Begaj, sot e ka nderuar me mirënjohje “Mulliri i Ri” nga Mamusha, Raif Morinën, në emër të vëllezërve Morina, pronar të mullirit, për ndihmën e dhënë për Komunën e Malishevës, gjatë luftës së fundit.
“Në emër të Komunës së Malishevës, sot pata nderin ta pres dhe nderoj me mirënjohje, zotëri Raif Morina, për kontributin që “Mulliri i Ri” ka dhënë gjatë luftës së Ushtrisë Çlirimtare të Kosovës, për Komunën e Malishevës”, ka thënë kryetari i Komunës së Malishevës, Ragip Begaj, me rastin e dhënies së mirënjohjes.
Raif Morina, që mori mirënjohjen, tha se “kjo mirënjohje është një çmim i madh për familjen e tij, pasi me këtë vlerësohet kontributi i familjes gjatë luftës, kontribut të cilin, si çdo qytetar i vendit, e kemi pasur obligim ta bëjnë”.
Morina e ka falënderuar Komunën e Malishevës, për këtë mirënjohje dhe vlerësimin e bërë për kohën e luftës. /TV Malisheva
