Kryetari i Partisë Demokratike të Kosovës, Memli Krasniqi ka përmbyllur vizitën zyrtare dy ditore në Shqipëri, me nderime para shtatores së komandantit legjendar, Adem Jashari.
Krasniqi, i shoqëruar nga nënkryetari i Tiranës, Andi Seferi, anëtari i Këshillit Bashkiak, Luan Bregasi, Andriola Kambo, drejtoreshë e Unionit të Bashkive dhe delegacioni nga Kosova, nënkryetarët e PDK-së Vlora Çitaku e Uran Ismaili, sekretari Bajrush Xhemajli dhe shefi i grupit parlamentar, Abelard Tahiri kanë bërë homazhe para shtatores së komandantit legjenda në Tiranë, nga ku ka bërë thirrje që një e tillë të ndërtohet edhe në Prishtinë.
“Vizitën zyrtare në Shqipëri e përmbylla me nderime tek shtatorja e komandantit legjendar të UÇK-së, Adem Jashari. Vepra dhe sakrifica e tij dhe e familjes Jashari për lirinë, sot janë frymëzim për shqiptarët gjithandej. Sikur kryeqyteti i Shqipërisë që tash e sa vjet e ka shtatoren e Adem Jasharit, edhe Kryeqyteti i Kosovës, Prishtina, duhet ta ketë së shpejti një të tillë në qendër të saj.”, ka shkruar Krasniqi.
Gjatë vizitës në Tiranë, Krasniqi ka takuar kryeministrin Edi Rama, kryetaren e Kuvendit, Lindita Nikolla, kryetarin e Tiranës, Erion Veliaj dhe kryetarin e Partisë Demokratike të Shqipërisë, Lulzim Basha./TV Malisheva
