Seanca e Qeverisë së Malit të Zi është ndërprerë sot pas një sherri mes kryeministrit Zdravko Krivokapiq dhe ministrit të Punëve të Jashtme Gjorgje Raduloviq për vendosjen e sanksioneve ndaj Rusisë, konfirmohet për agjencinë Beta.
Kryeministri Zdravko Krivokapiq kërkoi që vendimi për sanksionet ndaj Rusisë të mos merret nga Qeveria, por nga Ministria e Punëve të Jashtme, gjë që u kundërshtua nga ministri Gjorgje Raduloviq, duke shpjeguar se është kompetencë kushtetuese e Qeverisë dhe se kryeministri donte të lironte veten nga përgjegjësia për sanksionet.
Pas diskutimit, Krivokapiq e ndërpreu seancën. Në rendin e ditës të seancës së sotme të Qeverisë ishte Projektvendimi për vendosjen e masave shtrënguese ndërkombëtare të përcaktuara me vendimin e Këshillit të BE-së në përgjigje të njohjes së rajoneve ukrainase Donetsk dhe Luhansk të cilat nuk janë nën kontrollin e Qeverisë së Ukrainës dhe urdhrin që forcat ruse të hyjnë në ato zona.
Komisioni për Sistemin Politik të Qeverisë së Malit të Zi, i kryesuar nga zëvendëskryeministri Dritan Abazovic, miratoi njëzëri dy ditë më parë një paketë sanksionesh kundër Rusisë, e cila më parë ishte miratuar nga Këshilli i Bashkimit Evropian. Është pjesë e procedurës së rregullt, por qeveria duhet ta konfirmojë vendimin për ta zbatuar.
Qeveria deri më tani nuk e ka futur në rend dite vendimin, pasi nuk ka pasur shumicën e nevojshme për miratim.
Ministria e Punëve të Jashtme e Malit të Zi ka përgatitur dy javë më parë një propozim për vendim mbi bazën e të cilit do të operacionalizohej vendosja e sanksioneve ndaj Rusisë.
Podgorica zyrtare, e cila iu bashkua sanksioneve të BE-së, nuk mori vendimet e nevojshme për zbatimin e tyre.
Më 1 mars, faqja e internetit e qeverisë njoftoi se Mali i Zi iu bashkua të gjitha masave kufizuese, duke përfshirë tetë paketa të sanksioneve individuale dhe ekonomike të BE-së kundër Rusisë.
Sipas Ligjit për Masat Kufizuese Ndërkombëtare, Ministria e Punëve të Jashtme propozon masa që Qeveria duhet t’i miratojë zyrtarisht para zbatimit. Pas vendimit, qeveria u dërgon një listë masash institucioneve shtetërore të ngarkuara për zbatimin e tyre.
Mali i Zi mbylli hapësirën ajrore për avionët rusë më 4 mars, por nuk ndaloi mediat shtetërore ruse. Nuk ka asnjë informacion zyrtar për ngrirjen e mundshme të pronës ruse.
/TV Malisheva
