20 korriku do të jetë data kur kampionati i Kosovës në futboll duhet të përfundojë. Kjo datë vlen edhe për të gjitha kampionatet evropiane, vendim ky që ka ardhur dje pas mbledhjes së UEFA-s me 55 federatat anëtare të saj.
Nga ky vendim situatë në klubet kosovare ka filluar të vështirësohet, pasi ekipeve ju duhet të bëjnë plane te reja por që do të kenë ngarkesa të mëdha.
Trajneri i Feronikelit, Afrim Tovërlani ka thënë se tashmë e dinë kur gara duhet të mbyllet, por ende nuk e kanë një datë kur mund t’i nisin përgatitjet në grup, kjo gjë varet nga Institucioni i Shëndetësisë së Kosovës i cili edhe do të dalë me masat e reja pas 4 majit, kur edhe përfundojnë këto masa të vendosura më herët ku vetëm 1 orë e gjysmë i lejohet çdo qytetari të dalë jashtë, dhe atë në kohë të ndryshme sipas numrin të parafundit përsonal.
“Deri sa nuk marrim sinjalin nga FFK-ja apo institucionet shtetërore të shëndetësisë nuk mund të themi asgjë sa i përket datës së nisjes së përgatitjeve”, ka thënë Tovërlani për “Zërin” duke shtuar se duhet pasur parasysh se ekipeve para fillimit të kampionatit u duhen së paku 3 javë përgatitje, ndryshe mund të rrezikohet shëndeti i tyre nëse nisin menjëherë me gara.
“Të gjithë duhet ta dinë që së paku na duhen tri javë për t’i filluar ndeshjet, pra ky është minimumi duke menduar në shëndetin e futbollisteve.
Sipas meje nga fillimi i javës së ardhshme të fillohet puna në grupe dhe sipas situatës e virusin të reagojmë edhe ne. Nëse fillohet në fund të majit mund të përfundojmë edicionin dhe ndeshjet për Kupë”, ka përfunduar Afrim Tovërlani.
