Disa nga barnatoret në kryeqytet sot po protestojnë në shenjë pakënaqësie lidhur me vendimin e Komunës së Prishtinës për kujdestari.
Sipas këtij vendimi nga e hëna deri të shtunën pesë barnatore në gjithë kryeqytetin qëndrojnë të hapura gjatë natës. Ndërkaq, të dielën dhe festave janë dhjetë barnatore kujdestare.
“Në shenjë pakënaqësie për faktin se jemi vënë në pozitë te aktit të kryer, barnatoret e paraqitura në kërkesë do të organizojnë protestë ditën e diel datë 19.11.2023, duke i hapur barnatoret por duke mos shitur barna, dhe atë çdo të diele deri në ndryshimin e kësaj rregulloreje dhe rikthimin e orarit të vjetër. Kjo shkresë është njoftim për protestë. Kjo rregullore madje ashpërson gjobat ndaj bizneseve-barnatoreve prandaj është në kundërshtim me parimin kushtetues të proporcionalitetit në raport me dëmin që i shkaktohet shtetit prandaj ankuesit presin që komuna të mos shqiptoj gjoba për protestën e organizuar nga barnatoret ankuese”, thuhet në shkresën e dorëzuar dy ditë më parë.
Rreth një muaj më parë, komuna e Prishtinës kishte marrë vendim për ndryshimin e rregullores për orarin e punës për barnatoret duke e kufizuar atë deri në ora 21:00.
Pas orës 21:00, komuna e Prishtinës me rotacion kishte caktuar disa barnatore kujdestare të cilat do të ishin në dispozicion të qytetarëve gjatë natës.
“Orari i kujdestarisë së natës për barnatore është prej orës 21:00 deri në 07:00, kujdestarojnë 5 (pesë) barnatore në gjithë kryeqytetin. Gjobiten me nga 300 deri në 1000 euro personi fizik dhe nga 1000 deri në 3000 euro personi juridik, nëse nuk i përmbahen orarit të përcaktuar. Orari i barnatoreve kujdestare do të publikohet së shpejti”, thuhej në njoftimin e komunës.
/TV Malisheva
