Shtetet e Bashkimit Evropian, të mërkurën, votuan për paketën e tetë të sanksioneve kundër Rusisë, të cilat përfshijnë kufizimin e çmimeve të naftës ruse të eksportuara nga vendet e treta. Pas miratimit të këtij vendimi, Serbia nuk do të mund të importojë naftë nga Rusia përmes Janaf-it (Gazsjellësit Adriatik), çka do të thotë se sanksionet e vendosura ndaj Moskës praktikisht janë bartur edhe në Beograd.
Propozimi fillestar i Komisionit Evropian parashikonte një përjashtim kur bëhet fjalë për furnizimin nga gazsjellësi i Adriatikut, por me insistimin e disa vendeve anëtare të BE-së, ai propozim u refuzua, sepse qëndrimi është se nuk ka arsyetim që Serbia të përjashtohet.
Arsyetimi tjetër ishte se Serbia nuk po vendos sanksione ndaj Rusisë, prandaj nuk duhet të përfitojë nga derogimi.
Ky vendim, sipas mediave të afërta me presidentin Vuçiq, ka tronditur këtë të fundit, i cili beson se Kroacia është përgjegjësja për bllokadën e vendosur ndaj Beogradit.
“Presidenti i Serbisë është i pakënaqur me vendimin e BE-së, pasi që Bullgaria ku vepron një kompani ruse e derivateve, ka marrë pozitë të privilegjuar, pra një përjashtim”, raporton mediumi serb Nova.rs.
Sipas kryeministres serbe, Ana Bërnabiç, ky vendim i Bashkimit Evropian ka ndryshuar gjithçka për Serbinë.
“Unë thashë se presidenti do të jetë nën presion të madh, sot pas këtij vendimi të turpshëm të Bashkimit Evropian, Vuçiq do t’i përgjigjet ashpër sanksioneve që nguli këmbë Kroacia. Nga xhepat e vendit tonë po dalin qindra milionë euro”, ka thënë Bërnabiç.
Serbia dhe Bashkimi Evropian
Ndryshe Ministrat e Energjisë, javën e kaluar gjatë diskutimit të paketës së re të sanksioneve kundër Rusisë, ishin të pajtimit të miratojnë një masë me të cilën vendet e Ballkanit Perëndimor do të përjashtoheshin nga kufizimet në lidhje me naftën e cila vjen nga Rusia.
Kështu të paktën kishte raportuar Radio Evropa e Lirë, duke u thirrur në burime diplomatike.
Kjo dispozitë sipas REL-ti, ishte ekskluzivisht për ato shtete të Ballkanit Perëndimor, të cilat nuk kanë dalje në det dhe që importojnë naftën ruse përmes Kroacisë.
Gjatë miratimit të paketës së pestë të sanksioneve kundër Rusisë, në prill të këtij viti, BE-ja përjashtoi në mënyrë të ngjashme Serbisë, gjë që bëri të mundur vazhdimin e furnizimit të pandërprerë të naftës në tregun vendas nëpërmjet Gazsjellësit Adriatik (JANAF).
/TV Malisheva
