Eksperti për Ballkanin Oliver Jens Schmitt, ka folur për situatën në veriun e Kosovës.
Ai në një intervistë për gazetën gjermane T-Online tha se Albin Kurti, është kryeministri i parë nga Kosova i cili i ka rrezikuar raportet me Shtetet e Bashkuara të Amerikës.
“Problematike për Kurtin është tani sepse ai është tani kryeministri i parë nga Kosova që rrezikon një konflikt me Shtetet e Bashkuara. Kjo sigurisht që mund ta dobësojë atë brenda vendit, edhe nëse opozita aktualisht nuk është shumë e dukshme”, tha ai.
Schmitt u shfaq kritik për Francën dhe Shtetet e Bashkuara.
“Franca është më pak e rëndësishme në këtë çështje: qeveritë e saj nuk kanë qenë shumë aktive në Ballkanin Perëndimor dhe kanë qenë gjithmonë të kujdesshme ndaj shqiptarëve të Kosovës. Më duket e habitshme që SHBA-të dhe Franca tani janë relativisht të njëanshme duke fajësuar Kosovën dhe mezi kritikojnë Serbinë”, tha Schmitt.
Ai tha se i sheh si një “dhuratë politike” për presidentin e Serbisë Aleksandar Vuçiq.
“Po, veçanërisht në lidhje me situatën e brendshme politike në Serbi. Javët e fundit ka pasur demonstrata masive të krahasueshme me ato që çuan në përmbysjen e presidentit të atëhershëm Slobodan Millosheviq më shumë se 20 vjet më parë. Presidenti serb Aleksandar Vuçiq është nën presion të madh. Ngjarjet aktuale në Kosovë janë dhuratë politike për të. Ai tani mund të thotë: Bashkëkombësit tanë janë në rrezik, duhet t’i bashkojmë radhët tani. Në këtë aspekt ai i tërhoqi të gjitha ndalesat, e vendosi ushtrinë në kufi dhe përdori bandidët e tij kundër trupave të KFOR-it”.
/TV Malisheva
