Qendra e Studentëve tash e dy muaj po shërben si karantinë për të riatdhesuarit në Kosovë.
Në konviktin 6 dhe 8 gjatë së premtes kanë qenë të sistemuar mbi 170 banorë. Drejtori i Qendrës së Studentëve, Fatmir Sfishta, thotë për KosovaPress se vetëm gjatë ditës së djeshme kanë ardhur nga Kroacia, Sllovenia, e Zvicra rreth 100 shtetas.
Sfishta: Janë 177 persona të karantinuar në Qendrën e Studentëve
“Për momentin janë 177 persona që gjenden në karantinë, në konviktin 6 edhe në konviktin 8 janë të sistemuar. Ditën e djeshme kanë ardhur rreth 100 persona jashtë Kosovës, kryesisht nga Kroacia, Sllovenia dhe një kontingjent ka ardhur nga Zvicra. Nuk kemi informacione të sakta se çfarë numri do të vjen sot…ne jemi të gatshëm të pranojmë sado që të vijnë”, thotë ai.
Mëngjesin e së premtes, Ambasada e Kosovës në Slloveni, në koordinim me institucionet e Republikës së Kosovës ka mundësuar kthimin në Kosovë edhe të 47 bashkatdhetarëve që ndodheshin në Slloveni, të cilët kishin raste urgjente shëndetësore dhe të natyrave tjera.
Sfishta thekson se mbrëmë janë liruar disa persona të cilët kanë rezultuar negativ me Covid-19.
Sfishta: Mbrëmë janë liruar të gjithë ata që janë testuar
“Dje aq sa janë testuar nuk e di numrin e saktë, janë liruar mbrëmë në orët e vona ata që kanë dalë negativë, të gjithë kanë dalë negativë”, shton Sfishta për KosovaPress.
Konviktet tash e dy muaj po shërbejnë për të karantinuar personat që po riatdhesohen në Kosovë. Sfishta tregon se gjatë verës në rast se do të merret vendim që Qendra e Studentëve të lirohet nga karantina, do të bëjnë riparime, sepse sipas tij ka pasur dëmtime nga personat që kanë qenë të karantinuar.
Sfishta: Gjatë verës do të bëjmë riparimet e nevojshme në Qendrën e Studentëve
“Shpresoj që do të merret një vendim që Qendra e Studentëve të lirohet nga karantina dhe t’i kthehet vetvetes. Qendra e Studentëve për studentë, dhe ne jemi të gatshëm që gjatë muajve të verës t’i bëjmë riparimet e nevojshme, sepse ka pasur edhe dëmtime nga personat që kanë qenë të karantinuar. T’i kryejmë disa investime që i kemi pasur të planifikuara. Sigurisht që ne jemi të gatshëm që muajin tetor t’i presim studentët e rinj në Qendrën e Studentëve”, thekson ai.
Nga data 18 deri më 23 maj, studentët banues të konvikteve do të kenë mundësinë t’i tërheqin gjësendet e tyre nga konviktet të cilat janë bosh dhe nuk ka të karantinuar./ Tv Malisheva
