Zyrtarët e SHBA-së dhe NATO-s besojnë se Bjellorusia mund “së shpejti” t’i bashkohet Rusisë në sulmin kundër Ukrainës dhe se vendi tashmë po merr hapa për ta bërë këtë, raporton CNN.
Është gjithnjë e më shumë “e mundshme” që Bjellorusia të hyjë në konflikt, tha një zyrtar ushtarak i NATO-s për rrjetin televiziv amerikan.
“Putin ka nevojë për mbështetje. Çdo gjë do të ndihmonte”, shpjegoi zyrtari.
Një burim nga opozita bjelloruse tha se njësitë luftarake bjelloruse janë gati të hyjnë në Ukrainë në ditët e ardhshme, me mijëra forca të gatshme për dislokim.
Sipas këtij burimi, kjo do të ketë një ndikim gjeopolitik, duke pasur parasysh implikimet që një vend tjetër t’i bashkohet luftës.
Një zyrtar i lartë i inteligjencës së NATO-s tha veçmas se Aleanca vlerësoi se qeveria bjelloruse po përgatiste mjedisin për të justifikuar ofensivën bjelloruse kundër Ukrainës.
Muajin e kaluar, bjellorusët votuan për të lejuar që vendi të presë forcat ruse dhe armët bërthamore përgjithmonë, megjithëse zyrtarët amerikanë i thanë CNN se ata nuk kishin parë ende asnjë provë që Rusia po transferonte ose po përgatitej për armë bërthamore.
Burimet theksuan se deri më sot nuk ka asnjë indikacion që Bjellorusia po merr pjesë aktualisht në luftimet në Ukrainë, dhe një zyrtar i lartë i mbrojtjes amerikane tha se Pentagoni nuk ka parë “asnjë indikacion që bjellorusët po përgatiten të kalojnë në Ukrainë ose kanë bërë ndonjë marrëveshje.”
Një zyrtar ushtarak i NATO-s tha se vendimi përfundimtar për përfshirjen e Bjellorusisë në luftë ende nuk është marrë në Moskë dhe për momentin nuk ka indikacione se forcat bjelloruse po marrin pjesë në luftimet në Ukrainë.
“Kjo nuk ka të bëjë me atë që dëshiron Alexander Lukashenko,” tha zyrtari, duke iu referuar presidentit bjellorus.
“Pyetja është: a dëshiron Putin një vend tjetër të paqëndrueshëm në rajon? Përfshirja do të destabilizonte Bjellorusinë, “tha zyrtari.
Ai nuk donte të specifikonte se si Bjellorusia mund të ndërhynte në luftë, por tha se kishte kuptim që Rusia të përpiqej të ndalonte ndihmën ushtarake të NATO-s që vinte në Ukrainë nga kufiri i saj perëndimor.
