Presidenti Hashim Thaçi ka thënë se Komisioni i Venecias në përgjigjen drejtuar kryeministrit në detyrë Albin Kurti rreth kompetencave të kreut të vendit për emrin e mandatarit, kundërshton kërkesën e Qeverisë për interpretimin e Kushtetutës, ndërsa e njëjta çështje është në pritje të Gjykatës Kushtetuese.
“Për ndryshim nga Qeveria e shkarkuar, Komisioni i Venecias shpreh besim dhe mbështetje të plotë për gjykatën tonë. Në të njëjtën kohë, shpreh disponueshmërinë për të bashkëpunuar me autoritetet e Kosovës për çështje të tjera që janë në kompetencën e tyre”, ka shkruar presidenti Thaçi në Facebook.
Ai ka shtuar se respektimi i vendimeve dhe autoritetit të Gjykatës Kushtetuese është thelbësor për sundimin e ligjit në Kosovë.
Ndryshe, Komisioni i Venedikut i është përgjigjur sot kryeministrit në detyrë, Albin Kurti, në lidhje me kërkesën për opinion në raport me kompetencat e presidentit, pasi që Gjykata Kushtetuese ka marrë vendim për vendosjen e masës së përkohshme deri më 29 maj, duke e pezulluar veprimin e dekretit të presidentit.
Në përgjigjen e tij, Komisioni i Venedikut kërkon të respektohet dhe njëherësh të pritet shqyrtimi i kërkesës dhe vendimi përfundimtar i Kushtetueses./TV MALISHEVA/
