Këngëtarja e famshme me origjinë shqiptare, Rita Ora, e cila një ditë më parë mbërriti në Tiranë, u dekorua nga presidenti me titullin e lartë “Naim Frashëri”, për kontributin e dhënë në lartësimin e vlerave artistike dhe njerëzore përmes artit.
Më pas gjatë ditës këngëtarja u prit dhe nga ftuesi i saj kryebashkiaku Erion Veliaj, i cili e falënderoi Rita Orën për shembullin pozitiv që u jep të rinjve dhe të rejave shqiptare. Këngëtarja me famë botërore Ora, u shpreh krenare për origjinën e saj dhe siguroi se nuk do të ndalet së promovuari atë.
“Nuk ka rëndësi nga vjen, kush je, je burrë apo grua, ndjesia është e tillë që, nëse ti je krenar për prejardhjen, ajo që mund të bësh është ta bësh të njohur vendlindjen tënde. E kam besuar gjithmonë këtë dhe prindërit e mi ma kanë thënë çdo herë. Unë do të vazhdoj ta bëj këtë derisa të jem gjallë”, ka thënë ajo.
Rita Ora, ka vizituar një qendër komunitare të fëmijëve në Tiranë që mbështetet nga UNICEF duke kaluar një kohë me fëmijët, dhe duke zhvilluar aktivitete të ndryshme.
Të martën Rita Ora do të mbajë koncert falas në sheshin Skënderbej, raporton TCh.
Nisur nga ngjarja e fundit në Kosovë, e dhunimit të një vajze 11-vjeçare, koncerti i Rita Orës do të përcjellë një mesazh sensibilizues për shoqërinë shqiptare, për të respektuar më shumë gratë dhe vajzat.
