Nënkryetari i PDK-së, Shaqir Totaj ka komentuar vizitën e djeshme të kryeministri në detyrë, Albin Kurti dhe kryetari i komunës së Prizrenit, Mytaher Haskuka në Suharekë dhe Mamushë, derisa thotë ai se ata nuk kanë gjetur kohë ta vizitojnë edhe Hasin, pas motit me furtunë.
Dy ditë më parë fortuna shkaktoi dëme të shumta në bujqësi, infrastrukturë dhe në ekonomitë familjare.
Totaj shkruan se është për të ardhur keq, se si Kryeministri nuk gjen kohë ta vizitojë një rajon të madh, për t’i ofruar përkrahjen e merituar institucionale.
Ai madje thotë se gjatë tri viteve të fundit, kur pushtetin lokal e udhëheq Vetëvendosje, Hasi është injoruar vazhdimisht.
Kjo qasje, sipas tij tregon se Kurti e Haksuka shkojnë në Has, vetëm sa për të “shnuk” vota, të cilat ndonëse të pakta, deri tash i kanë marrë pa asnjë meritë.
Postimi i plotë i Totajt në Facebook:
Injorimi i Hasit nga kryeministri në detyrë, Albin Kurti
Kryeministri në detyrë, Albin Kurti dhe kryetari i komunës së Prizrenit, Mytaher Haskuka nuk kanë gjetur kohë ta vizitojnë edhe Hasin, pas motit me furtunë, që dy ditë më parë përfshiu edhe këtë rajon, duke shkaktuar dëme të shumta në bujqësi, infrastrukturë dhe në ekonomitë familjare.
Kurti dje ka qenë vetem në Suharekë dhe Mamushë e Haskuka në Anadrini, shumë afër Hasit, por nuk kanë e parë të arsyeshme të dalin andej Drinit, meqenëse tash nuk është fushatë zgjedhore. Hakuka nuk e ka parë të arsyeshme që nga Pirana, të vazhdojë për në fshatin përballë, në Krajk, Gjonaj, Bregdri e gjetiu ku ka dëme të shumta.
Është për të ardhur keq, se si Kryeministri nuk gjen kohë ta vizitojë një rajon të madh, për t’i ofruar përkrahjen e merituar institucionale. Kjo tregon qartë se Hasi nuk paraqet ndonjë interes për pushtetin aktual.
Pos, dëmeve të konsiderueshme nga moti, Kurti është dashur ta vizitojë e madje ta falënderoi Hasin edhe për një arsye të rëndësishme në kohën e pandemisë. Në këtë rajon, deri tash nuk ka pasur asnjë rast me koronavirus.
Në fakt, gjatë tri viteve të fundit, kur pushtetin lokal e udhëheq Vetëvendosje, Hasi është injoruar vazhdimisht. Këtë më së miri e dëshmon gjendja e mjerueshme e rrugës rajonale Gjonaj-Kushnin, traseja e të cilës është deformuar tërësisht.
Pavarësisht kësaj, Hasi që njihet për zemërgjerësinë dhe bujarinë e vet, duke dhënë kontribut gjatë gjithës historisë, dhe që ia ka dalë edhe në rrethanat më të vështira do t’ia dalë edhe tash.
Të gjithë qytetarët dhe komunat duhet të trajtohen barabartë. Hasi andej e këndej kufirit, që pasur një rol të rëndësishëm dhe vatër e Ushtrisë Çlirimtare të Kosovës, ka qenë dhe është shembull i qytetarisë punëtore, andaj pa ndonjë hezitim meriton përkrahje, si nga pushteti lokal ashtu edhe nga ai qendror.
Kjo qasje, tregon se Kurti e Haksuka shkojnë në Has, vetëm sa për të “shnuk” vota, të cilat ndonëse të pakta, deri tash i kanë marrë pa asnjë meritë./Tv Malisheva
