Zyra e Bashkimit Evropian në Kosovë ka bërë të ditur se përfaqësuesi i posaçëm i BE-së për dialogun Kosovë-Serbi, Miroslav Lajçak do të qëndrojë në Prishtinë nga sot deri më 18 qershor. Ai vjen në Kosovë për të diskutuar për rifillim të shpejtë të dialogut. Presidenti i vendit, Hashim Thaçi ka thënë se Lajçak është i mirëseardhur nëse e kupton që Kosova është shtet sovran dhe i pavarur, ndërsa kryeministri Avdullah Hoti ka konfirmuar se do ta pres në takim për t’i paraqitur qëndrimin e qeverisë rreth çështjes së dialogut.
Zyra e BE-së bën të ditur se Lajçak planifikon të diskutojë kushtet dhe modalitetet për një rifillim të shpejtë të dialogut, të lehtësuar dhe Bashkimi i Evropian.
“Në Kosovë, Ambasadori Lajçak do të takohet me udhëheqjen politike, përfaqësuesit e partive politike dhe të komunitetit ndërkombëtar në Kosovë, si dhe krerët e misioneve të vendeve anëtare të BE-së. PPBE-ja planifikon të diskutojë kushtet dhe modalitetet për një rifillim të shpejtë të Dialogut të lehtësuar nga BE-ja mes Prishtinës dhe Beogradit. Gjatë qëndrimit në Kosovë, PPBE-ja do të shfrytëzojë këtë mundësi për t’u njohur me situatën në terren”, thuhet në njoftimin e zyrës së BE-së në Kosovë.
Për këtë është pyetur edhe presidenti Thaçi, i cili në paraqitjet e tij të mëhershme kishte vënë në dyshim rolin e përfaqësuesit të BE-së, duke thënë se Kosova duhet të njihet si shtet i pavarur, dhe se çdo qasje tjetër është e dështuar.
Thaçi: Lajçak duhet ta kuptojë që Kosova është e pavarur dhe sovrane
“Unë nuk jam i informuar për agjendën dhe përmbajtjes së vizitës së Lajçakut në Kosovë. Nuk është koha më që të hapen çështje teknike, me pretendime për normalizim të marrëdhënieve mes Kosovës dhe Serbisë. Lajçak duhet të kuptojë se Kosova është e pavarur dhe sovrane. Nëse vjen me këtë objektivë dhe qasje që duhet të përmbyllet me njohje reciproke është i mirëseardhur. Çdo qasje tjetër është e dështimit të tij në Kosovë, por edhe vet të BE-së”, ka thënë Thaçi sot para gazetarëve.
Derisa presidenti thotë se nuk di asgjë për agjendën e përfaqësuesit të BE-së, kryeministri Avdullah Hoti thotë të ketë qenë në komunikim të vazhdueshëm dhe se do të takohen për të diskutuar rreth dialogut.
Hoti: Në takim me Lajçak do të prezantoj qëndrimin e Qeverisë së Kosovës rreth dialogut
“Lajçak vjen nesër në Prishtine për të prezantuar këtë qëndrim tonin. Unë kam qenë komunikim me të komplet gjatë gjithë javës së kaluar me të dhe ambasadorë tjerë të Qunit-it. Unë besoj që ngadalë po formësohet dhe unifikohet qëndrimi i të gjithë institucioneve të Kosovës sa i përket dialogut”, ka thënë Hoti pasi është pritur në takim nga presidenti i vendit.
E politologu Ramush Tahiri thotë se Lajçakun duhet ta takojnë të gjithë krerët e institucioneve të Kosovës, meqë i njëjtë vjen me një porosi.
Tahiri: Lajçak vjen në Kosovë për të matur terrenin rreth dialogut Kosovë-Serbi
“Sa herë vjen përfaqësuesi i Evropës e takojnë të gjitha institucionet, ai vjen për me matë terrenin dhe me i kriju kushtet për vazhdimin e dialogut. Dialogu në Bruksel, asnjëherë nuk ka marrë pjesë presidenti dhe asnjëherë presidenti nuk ka asnjë nënshkrim , cilido qe ka qenë president, në dokumentet e marrëveshjeve ndërmjet Kosovës dje Serbisë, këto i ka bërë qeveria dhe do të vazhdojë t’i bëjë qeveria. Deklaratat e presidentit Hashim Thaçi që ai do të shkojë në takime me ShBA ose Grenellin e nuk do te shkojë në takime me BE-në, varët prej karakterit të bisedimeve dje varet prej ftesës që e bën nikoqiri”, thotë Tahiri.
Edhe Violeta Haxholli nga Instituti Demokratik i Kosovës, thotë se Lajçak duhet të takohet nga të të gjithë përfaqësuesit e institucioneve në Kosovë, ndërkohë shton se i njëjti do të kërkojë përkushtim nga Kosova për një rifillim sa më të shpejtë të dialogut.
Haxholli: Lajçak do të kërkojë nga Kosova përkushtim në procesi ne dialogut
“Besoj nga ana e zotit Lajçak do të vlerësohet që Kosova me anë të shfuqizimit të masave të reciprocitetit ka treguar vullnet dhe gatishmëri që të rikthehet në tryezën e bisedimeve. Besoj që do të kërkohet përpjekje dhe përkushtim nga ana e përfaqësuesve të Kosovës në këtë proces në mënyrë që sa me shpejtë Kosova dhe Serbia të arrijnë apo të përmbyllin procesin e normalizimit të marrëdhënieve me një marrëveshje ndërkombëtare dhe ligjërisht të obligueshme”, thotë Haxholli.
Ajo shton se liderët politik në Kosovë duhet të prezantohen me qëndrim unik në këtë çështje, në mënyrë që mos të rrezikojnë të përçojnë mesazhe të ndryshme të partnerët ndërkombëtar.
Haxholli: Kosova nuk e ka luksin të zgjedh kush do të jetë përfaqësues i BE-së në dialog
“Nuk besoj që ne si shtet i vogël e kemi atë lluksin qe të përcaktojmë se cilët do të jenë ata përfaqësues të BE-së që caktojnë nga ana e Bashkimit Evropian qoftë në procesin e dialogut apo procese te tjera” shton ajo.
Përfaqësuesi i posaçëm i Bashkimit për dialogun Kosovë-Serbi, dhe çështje të tjera rajonale të Ballkanit Perëndimor, Mirosllav Lajçak është në vizitë në Kosovë për herë të parë pas marrjes së pozitës së tij të re.
Muaj më parë, Lajçak ishte deklaruar kundër korrigjimit të kufijve duke thënë se një gjë e tillë nuk kontribuon në stabilitetin rajonal./Tv Malisheva
